Aktrise ná kankerstryd: ‘Ons is sterker as wat ons dink’

Crystal Donna Roberts na haar kankerbehandelinge agter die rug is (Foto: Instagram)

“Dit is een van ʼn mens se grootste vrese om dit te hoor. Dit was asof die mat onder my uitgepluk is.” vertel sy oor hoe dit gevoel het toe sy hoor van die kanker.

Crystal Donna Roberts, bekend vir haar rolle in die eerste reeks van Fynskrif en die rolprent Krotoa, is in Maart vanjaar met fase twee borskanker gediagnoseer nadat sy erge pyn in haar borste ervaar het.

Sy het egter nou ál haar kankerbehandelings agter die rug en vertel aan Maroela Media dat sy nie geweet het hoe sterk sy is, voordat sy kanker moes deurmaak nie.

Roberts het reeds in November verlede jaar vir biopsies begin gaan, maar eers na die derde keer is kanker in haar linkerbors gevind. “Al gaan ʼn mens vir die toetse, was dit ʼn groot skok.”

Sy sê daar was nie voorheen borskanker in haar familie nie, behalwe vir een tannie wat dit ook gehad het. Drie van haar oumas en oupas het wel ook ʼn ander soort kanker gehad. Sy sê sy het vroeër reeds genetika-toetse gedoen, maar dat dit getoon het dat sy nie ʼn vatbaarheid vir borskanker gehad het nie.

“Ná die skok het ek dadelik begin beplan, ek wou weet wat ons kan doen om hierdie ding te klop.”

Roberts moes op die dag van haar diagnose ook nog gaan werk. Sy vertel dat haar agent dus een van die eerste mense was wie sy vertel het, omdat hulle haar skedule moes aanpas volgens die nuwe vereistes vir doktersbesoeke, behandeling en hersteltyd ná chemosessies.

Cystal Donna Roberts (Foto: Instagram)

Roberts het drie biopsies, ʼn dubbel mastektomie, vier reekse chemo en 25 behandelings met bestraling deurgemaak, en nou kyk dié sprankelende aktrise net vorentoe.

“Ek voel lekker. Ek is oorweldig. Toe ek op daardie bed lê en my behandelinge klaarmaak het ek net gedink aan die afgelope jaar wat ek toegewy het aan gesond raak. Ek het aanhou werk en ek het so normaal as moontlik probeer lewe, sonder om in ʼn gat van bejammering te verval.

“Toe ek daar lê en ek weet dit is nou klaar, het die trane net begin vloei,” sê sy.

Roberts is wel ʼn bietjie op haar senuwees met die wete dat die kanker kan terugkeer. Sy sê sy dink konstant aan wat gaan gebeur as daar ʼn maand later weer iets op die skanderings wys.

Hoewel dit lyk of Roberts altyd positief is omdat daar altyd ʼn glimlag op haar gesig is, vertel sy dat dit by tye baie moeilik vir haar was.

“Baie mense sê hulle sou hierdie soort goed weer oor doen as hulle kon kies, omdat dit hulle baie geleer het, maar ek raak partykeer kwaad. Ek sou eerder my hele lewe daarsonder wou gaan. Ek wou nie op so ʼn manier ʼn les leer nie, gee eerder vir my ʼn ander manier om dit te leer.”

Iets wat haar wel positief maak is dat sy haarself verbaas het met hoe sterk sy werklik is.

“Toe ek hoor van die hele ding en wat ek gaan moet doen, het ek gedink: ‘Hoe op dees aarde gaan ek dit doen?’ Maar ek het dit gedoen! My ingesteldheid is oor die algemeen meer positief as voorheen.”

Crystal voor haar hare uitgeval het (Foto: Verskaf)

Behalwe vir haar ingesteldheid het sy ook meer begin oefen, ophou rook en gesonder begin eet. Sy sê ook sy dink nie meer so baie aan die kleinighede nie.

“Ons is so gewoond om te stres oor ʼn puisie of jou vet maag. Maar nou is dit nie meer belangrik nie, my lyf is gesond, en dís wat belangrik is. Wie gee om as ek nie soos Kendall Jenner lyk nie?” skerts sy.

Roberts vertel dat een van die mees traumatiese ervarings in haar kankerstryd was om haar hare te verloor.

“Ek mis my hare,” sê sy. “Ek het ʼn tegniek genaamd ‘cold capping’ probeer sodat my hare nie uitval van die chemo nie, maar na die eerste chemosessie het dit reeds begin uitval.

“Dit was eintlik vir my erger om my hare te verloor as om my borste af te sny. Dit was traumaties, die hare op my kop, my wimpers en wenkbroue – al die hare op my lyf het uitgeval.

“Dit gaan meer oor ydelheid. Ek het in ʼn stadium in die spieël gekyk en gedink ek herken nie myself nie. Ons neem so baie tyd, veral kunstenaars, om goed te lyk en om jouself te leer ken. Dis waaroor dit gaan want nou ken ek nie meer myself nie.”

Sy vertel dat haar vriendin, die bekende radio en-televisiepersoonlikheid Elana Afrika-Bredenkamp, ses pruike vir haar as ʼn geskenk gegee het, wat sy nou kan dra tot haar hare teruggroei.

Sy sê die lig in die donker is dat sy beter geraak het om aan te pas by ʼn nuwe normaal. “Dit gee my ook die kans om my hare gesond uit te groei, en dít is opwindend. Dit is soos ʼn nuwe begin.”

Roberts wil van nou af so gesond as moontlik lewe en so veel as moontlik pret hê – en vir haar sluit dit baie vonkelwyn en rooiwyn in.

Twee dinge het vir haar tydens dié stryd uitgestaan, wat sy nou vir mense wil vertel. Eerstens, dat ons almal baie sterker is as wat ons dink – onthou dit en vat alles een dag op ʼn slag. En tweedens dat jy iets merkwaardig met jou lewe moet doen.

“Ek het ʼn siekte gehad wat direk aan die dood gekoppel word, ek het dit direk in die oë gestaar. Dan besef jy dié lewe is ʼn geskenk. Ek lewe, so wat kan ek doen met hierdie lewe van my?”