‘GMR’-ster as Mnr. Wêreld Suid-Afrika gekroon

Sean van Noordwyk is as Mnr. Wêreld Suid-Afrika 2021 gekroon. (Foto: Facebook/Sean van Noordwyk)

Sean van Noordwyk, die donkerkop akteur bekend vir sy rol as die rugbyspeler Reitz in die kykNET-sepie Getroud met rugby, is Saterdag as Mnr. Wêreld Suid-Afrika gekroon.

Van Noordwyk (26) is tydens ʼn seremonie by The Galleria Conference and Events Venue in Sandton, Johannesburg gekroon. Hy het 14 ander finaliste uitgestof vir dié titel.

Anthony Sikanadze, ʼn liggaamsbouer, en Busa Vuyo Mbele, ʼn bemarkingsbestuurder en entrepreneur, is onderskeidelik in die tweede en derde plek aangewys.

“Ek is op die oomblik steeds geskok, maar hopelik sal my kop en liggaam vinnig bykom,” het Van Noordwyk Sondag op Instagram geskryf.

Die span van kykNET en Getroud met rugby het die akteur op sosiale media gelukgewens. “Baie geluk Sean! Ons het geweet jy kan dit doen en ons is super trots op jou.”