Terugslag vir Radio Raps

Rikus de Beer, oftewel Jonathan van Radio Raps (Foto: Verskaf)

Die Afrikaanse akteur en komediant Rikus de Beer, beter bekend as Jonathan van Radio Raps, is Maandag weer na die hoësorgeenheid van ʼn Pretoriase hospitaal oorgeplaas nadat hy weer infeksie opgedoen het ná ʼn lewensnoodsaaklike operasie op 8 Junie.

Zinta Kymdell, De Beer se agent, het Dinsdag aan Maroela Media gesê sy bestuurspan is vandeesweek genoodsaak om ʼn verdere drie optredes uit te stel aangesien dit onseker is hoe lank hy nog in die hospitaal sal wees.

Die komediant het op 8 Junie ʼn operasie ondergaan om galstene en sy galblaas te verwyder. Die operasie was suksesvol en het sonder enige komplikasies verloop.

“Sedert die operasie het Rikus ʼn hoë infeksietelling en sy liggaam hou vog terug. Hy is Maandag teruggeplaas in die hoësorgeenheid waar hy tans in isolasie mediese behandeling ontvang om die infeksie te genees en verdere infeksies te voorkom,” sê Kymdell.

Volgens haar is dokters egter steeds positief dat hy sal herstel. Sy het gesê hy was teen Dinsdag steeds kritiek, maar sy toestand was bestendig.

Die komediant se bestuurspan het sy optredes op 30 Junie by The Ridge in Witbank gekanselleer, asook sy optrede by Goldfields Casino in Welkom op 1 Julie en in Thabazimbi op 15 Julie.

Kymdell sê alle ander optredes bly onveranderend. Nuwe datums sal ook binnekort vir dié gekanselleerde optredes bekend gemaak word.

“Sy bestuurspan vra om verskoning vir die ongerief rakende optredes wat geskuif word. Rikus se gesondheid is prioriteit en ons wil graag sien dat hy eersdaags weer op die been sal wees.”

Maroela Media het vroeër berig De Beer is op 27 Mei in die hospitaal opgeneem ná afloop van sy optrede by Silverstar Casino naby Krugersdorp.

Hy het teen daardie tyd reeds behandeling ontvang vir komplikasies aan sy buik, maar het gevoel die optrede in Krugersdorp kan nie op sulke kort kennisgewing gekanselleer word nie. Hy het toe daarin geslaag om die optrede met ʼn binneaarse drup te doen. Op 29 Mei het hy ʼn operasie ondergaan en ʼn tweede operasie is vir die volgende dag geskeduleer, maar dié operasie is uitgestel nadat sy toestand verswak het. Hy is kort daarna na die hoësorgeenheid oorgeplaas weens ʼn hoë infeksietelling en hartversaking.

Dokters wou al vroeër sy galblaas verwyder, maar het aanvanklik gesê die risiko is te groot weens infeksie en die operasie is toe uitgestel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

15 Kommentare

jongste oudste gewildste
Adri

Ai, infeksie is ‘n lelike ding!

Magda

Agnee man!!!!!! Word asseblief gou gesond!! Hoor jy!!

Theresa

BAIE sterkte! Wat se infeksie is dit en wat het dit veroorsaak?

Francie

Infeksie na ‘n operasie moet nie gebeur nie. Higiëne? Dit is lewensgevaarlik. Kom ons vertrou hy is gou weer op die been. Verseker gaan hierdie ondervinding baie inhoud vir ‘n volgende optrede gee.

Cindy Smith

Ek bid vir spoedige herstel. Ek hoop dat die hardkoppige mense wat hul gesondheid uitstel en daardeur hul lewens op die spel plaas, leer hieruit. Ons lewens is baie belangriker as om ons gehoor tevrede te stel.