Die Aardklop Nasionale Kunstefees in Potchefstroom kook – letterlik én figuurlik. Hoewel die terrein vir die stalletjies reeds tjokkeblok is, meen feesbestuurder Alexa Strachan dat dié fees oor die naweek behoorlik uit sy nate gaan bars.
Strachan sê Aardklop 2016 is tot dusver uiters suksesvol. Dié fees word tot 9 Oktober aangebied en laatslapers het nog geleentheid om die stalletjies te besoek en verskeie kuns-, musiek- en verhoogproduksies te ondersteun.
“Ons verwag dat Potchefstroom uit sy nate gaan bars. Alles dui daarop dat die feesgees in nóg ʼn hoër rat sal gaan. Die kunste gaan ʼn koronêr skiet! Aardklop gaan definitief op ʼn hoë noot afsluit,” het Strachan gesê.
Maroela Media het met die sangeres Anna Davel gesels om te hoor hoe feesgangers hulself kan pantser teen die Aardklop-hitte – én skares dié naweek.