Vriend dalk geskikte skenker vir Adam Barnard

Adam Barnard. Foto: Facebook via Adam Barnard

Die Afrikaanse sanger Adam Barnard is hoopvol dat hy binnekort ʼn nieroorplanting kan ondergaan terwyl ʼn moontlike skenker tans verskeie geskiktheidstoetse ondergaan.

Louis Barnard, die sanger se pa, het Donderdag aan Maroela Media vertel die skenker, ʼn vriend van die sanger, moet nog talle voorbereidingstoetse ondergaan, maar alle tekens dui in dié stadium daarop dat die skenker se nier geskik sal wees.

Volgens Louis was sy seun nié op ʼn skenkerlys nie, maar die vriend het glo self vorendag gekom en het aanvanklik positief getoets.

Die sanger sou in April vanjaar ook voorbereiding vir ʼn nieroorplanting ondergaan, maar sy gesondheidstoetstand was volgens mediese personeel nie goed genoeg vir ʼn oorplanting nie.

Adam ly aan die neuropatie-sindroom wat gekenmerk word deur die verlies van gevoel in ledemate, soos die hande. Hy ontvang al  ʼn geruime tyd hemodialise-behandelings op Potchefstroom in die hoop dat sy gesondheid sal verbeter. Die enigste genesing vir dié toestand is ʼn suksesvolle nieroorplanting.

“Hy was vroeër vanjaar baie siek gewees – dermate dat hy nie die oorplanting kon kry nie,” vertel Louis. “Hy was in ʼn stadium permanent in die rolstoel of moes met die loopraam loop. Hy kry steeds die dialise, maar dit gaan baie beter met hom. Hy gebruik nou net soms die rolstoel en die loopraam en sy gesondheid lyk in hierdie stadium baie positief.”

Volgens hom sal die skenker ʼn langdurige keurproses van minstens drie maande moet ondergaan voordat die sanger sal kan weet of ʼn operasie wel moontlik sal wees. Sy gesondheid sal ook nog moet verbeter.

“Ons glo dat dinge dié keer goed sal gaan. Hy is nog nie 100% nie, maar hy kan nou sy hande beweeg, kort afstande loop en ander klein dingetjies doen. Ons bid en glo dat die Here in die bres sal tree en die paaie gelyk sal maak.”

Adam, ʼn voormalige lid van die musiekgroep Romanz, se oudgroeplede het in Julie vanjaar weer vir een optrede byeengekom om geld vir die sanger se behandeling in te samel. Meer as 4 500 mense het die geleentheid bygewoon.

Lees alle vorige berigte oor Adam Barnard op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

13 Kommentare

jongste oudste gewildste
Hanna

Vasbyt Adam, ons God is groot

Susan

Voorspoed aan Adam en sy vriend. Alle eer aan God!

Ingels Man

Indien 4500 mense bymekaar gekom het om musiek te luister, en ‘n bedrag van R20 000 is aan Adam geskenk, beteken dit dat R4,44 per persoon ingesamel is. Ag nee, ek dink ons kan beter. . Kan ons nie ‘n vonds vir Adam stig nie stig nie. R100 x 4500 = R450 000!

Kannaland

Baie dankie aan die vriend wat sy nier wil skenk, jy is n ware held en het werklik n baie goeie hart.

Ons hier bymekaar is die skare

Hierdie einste website is n goeie platform om skarebefondsing te reguleer. Dalk kan Maroela daaraan dink om skarebefondsing hier te doen. Hulle kan gekeurde mense wat hulp nodig het hier plaas, en opvolg dat die fondse reg aangewend was met hulp van Helpende hand.