Leon se resensie: Parallel Mothers

Parallel Mothers **** (in teaters)
Met Penélope Cruz en Milena Smit
Regisseur: Pedro Almodóvar

Dit is enige ma se ergste nagmerrie – dat iets in die hospitaal kan skeefloop waar sy geboorte skenk aan haar baba, veral omdat sy enkellopend is. Saam met haar in die hospitaal is nóg ʼn enkellopende ma, en dié twee vroue gee op presies dieselfde tyd geboorte aan hul babas. ʼn Mens wil nie verdere geheime hier verklap nie, anders kan dit die rolprent vir voornemende kykers bederf.

Hierdie is meer as ʼn blote kunsrolprent vanweë die aangrypende storie en die wrede kinkel wat die storie maak. Dit is in Spaans met Engelse byskrifte, maar moenie dat dit jou afskrik nie. ʼn Mens raak gou daaraan gewoond, en om te sien hoe hierdie drama hom voltrek, en die onverwagse wendings wat intree, maak die prys van ʼn fliektoegangskaartjie absoluut die moeite werd. Onthou, jy kan dit slegs in fliekteaters sien.

Boonop speel Penélope Cruz en Milena Smit so oortuigend en deurleef, dat ʼn mens nie anders kan as om vir albei ma’s simpatie te hê nie, al gebeur wát tussen hulle. Die film bevat ook al die karaktertrekke en eienskappe van Almodóvar se vorige trefferrolprente.

Sterk aanbeveel as ʼn romantiese melodrama wat die hartsnare sal roer.

Die fliek is vanaf 31 Desember 2021 by Ster-Kinekor te sien.

Leon van Nierop resenseer weekliks rolprente soos hierdie een op sy Facebook-blad. Besoek ook sy blad vir resensies oor rolprente met lokprente en interessante feite.

Leon van Nierop

Meer oor die skrywer: Leon van Nierop

Leon van Nierop is ’n bekende radiopersoonlikheid, rolprentresensent, vryskutjoernalis, stemkunstenaar, skrywer van romans, radio- en TV-vervolgverhale soos Wolwedans in die skemer en Ballade vir ’n enkeling asook die draaiboeke van die rolprente geskoei op hierdie twee verhale. Hy was vier jaar lank hoof van die Rolprentakademie van die Tshwane-Universiteit van Tegnologie en tree dikwels as dosent en spreker oor rolprente op. Hy het 'n Akademie Erepenning ontvang vir sy boek oor die geskiedenis van die Afrikaanse rolprentbedryf, Daar doer in die fliek. Sy jongste boek Bloedsuier is op die rakke en hy skryf tans aan 'n nuwe roman. Sy vorige twee romans, Katelknaap (vertaal as Toy Boy) is in 2018 uitgegee. Hy skryf ook aan Maroela se radiodrama wat binnekort die lig sien, Briekaandraai,

Deel van: Flieks

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.