Leon van Nierop se resensie: Meisies wat fluit

Meisies wat fluit ***
Met Leandie du Randt en Stiaan Smith
Regisseur: Johan Cronjé

Hierdie liefdesverhaal is ʼn wilde perd van ʼn ander kleur. Dis rof en draai geen (woord- of seks-) doekies om nie. Voornemende kykers moet gewaarsku word teen kru, maar gemotiveerde swetsery en vloekery asook erotiese sekstonele.

ʼn Man en ’n meisie wil skei. Maar is dit so maklik om sommer net vir mekaar te groet, alles om die helfte te verdeel en voort te gaan met ander mense in jou lewe? Waar pas liefde en gehegtheid aan mekaar in die prentjie?

Dikwels is ʼn egpaar met ʼn bloedige naelstring aanmekaar vasgebind, en dit is wat met Sofia en Henk gebeur. Hulle kan nie saam met mekaar lewe nie, maar ook nie sonder mekaar nie. Hulle baklei aanhoudend, maak mekaar seer, vloek mekaar op die kruuste wyse denkbaar uit, maar bly verlief op mekaar. Dit is liefde met ʼn vitrioel-gevoel hierdie. En enigiemand wat al ooit deur ʼn bloedige egskeiding geworstel het, sal verstaan en veral identifiseer met die pyn, verwyte en rusies.

Beide Leandie du Randt, ʼn staatmaker gesaghebbende aktrise, en Stiaan Smith, wat ʼn mens deesdae baie gereeld sien, veral in dié soort rolle, is uitstekend en daar is ʼn sinergie tussen hulle wat stuit vir niks.

Omgord jou lendene vir hierdie uitdagende, strawwe en rowwe verhaal oor egskeiding. En ons almal weet: dit kan net op een manier eindig…

Leon van Nierop resenseer weekliks rolprente soos hierdie een op sy Facebook-blad. Besoek ook sy blad vir resensies oor rolprente met lokprente en interessante feite

Leon van Nierop

Meer oor die skrywer: Leon van Nierop

Leon van Nierop is ’n bekende radiopersoonlikheid, rolprentresensent, vryskutjoernalis, stemkunstenaar, skrywer van romans, radio- en TV-vervolgverhale soos Wolwedans in die skemer en Ballade vir ’n enkeling asook die draaiboeke van die rolprente geskoei op hierdie twee verhale. Hy was vier jaar lank hoof van die Rolprentakademie van die Tshwane-Universiteit van Tegnologie en tree dikwels as dosent en spreker oor rolprente op. Hy het 'n Akademie Erepenning ontvang vir sy boek oor die geskiedenis van die Afrikaanse rolprentbedryf, Daar doer in die fliek. Sy jongste boek Bloedsuier is op die rakke en hy skryf tans aan 'n nuwe roman. Sy vorige twee romans, Katelknaap (vertaal as Toy Boy) is in 2018 uitgegee. Hy skryf ook aan Maroela se radiodrama wat binnekort die lig sien, Briekaandraai,

Deel van: Flieks

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.