Leon van Nierop se resensie: The English Game

THE ENGLISH GAME    ***
Met Edward Holcroft en Kevin Guthrie
Skepper: Julian Fellowes en andere

Die reklame vir hierdie gesofistikeerde Britse reeks is bietjie misleidend. ʼn Mens vermoed dat die hele reeks gaan oor die ontstaan van voetbal (later sokker) in Skotland, en watter drama alles agter die skerms voltrek het. Episode 1 gaan wel oor een van die eerste sokkerwedstryde wat gespeel is en hoe die Old Etonians die spel as hul eie geklassifiseer het. Maar daarna raak dit meer behep met een van die sokkerspelers (Edward Holcroft) wie se vrou nie kan kinders hê nie, dan wil hulle ʼn kind aanneem, en konsentreer die reeks vir ʼn episode of wat daarop alvorens dit terugbeweeg na die sokkerspelers waarvan werkloses omgekoop word om hulle by die Old Etonians aan te sluit en die drama wat daarmee gepaard gaan.

Jy gaan in ʼn stadium vermoed dat jy na die stiefkind met ʼn sokkerbal van Downton Abbey kyk, want Julian Fellowes, een van die hoofskrywers, was die skepper van daardie trefferreeks. Maar uiteindelik vergaap ʼn mens jou aan die skoonheid van Skotland en hoe gesofistikeerde manne soos ware here sokker gespeel het. Van die rofheid en dikwels gewelddadige gevegte wat deesdae tussen spelers uitbreek, is daar min sprake.

Op Netflix.

Leon van Nierop

Meer oor die skrywer: Leon van Nierop

Leon van Nierop is ’n bekende radiopersoonlikheid, rolprentresensent, vryskutjoernalis, stemkunstenaar, skrywer van romans, radio- en TV-vervolgverhale soos Wolwedans in die skemer en Ballade vir ’n enkeling asook die draaiboeke van die rolprente geskoei op hierdie twee verhale. Hy was vier jaar lank hoof van die Rolprentakademie van die Tshwane-Universiteit van Tegnologie en tree dikwels as dosent en spreker oor rolprente op. Hy het 'n Akademie Erepenning ontvang vir sy boek oor die geskiedenis van die Afrikaanse rolprentbedryf, Daar doer in die fliek. Sy jongste boek Bloedsuier is op die rakke en hy skryf tans aan 'n nuwe roman. Sy vorige twee romans, Katelknaap (vertaal as Toy Boy) is in 2018 uitgegee. Hy skryf ook aan Maroela se radiodrama wat binnekort die lig sien, Briekaandraai,

Deel van: Flieks

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae