Leon van Nierop se resensie: The Nutcracker and the Four Realms

The Nutcracker and the Four Realms    ** (5/10)    
Met Mackenzie Foy en Keira Knightley
Regisseurs: Lasse Halström en Joe Johnston

Net ingeval ma’s en dogters daardie 5/10 raaksien en verward is (want almal ken tog Die Neutekraker-ballet en dit is ʼn Kersfees-gunteling), verstaan net een ding duidelik: Die rolprent gebruik die storie, en Tjaikofsky se geniale musiek as uitgangspunt en afskopplek, maar daarna verdwaal die fliek bietjie in inkleurboekprentjies. Wees egter verseker: Ma’s en hul spruite, veral kleuters en tienerdogters, mag gek wees hieroor en die puntetoekenning geld nié vir hulle nie. Hulle sal dalk al dansend en singend uit die teater beweeg en vir al hul vriendinne sê om “asseblief te gaan kyk! maak nie saak wat watter suur resensent sê nie”.

Die probleem wat hiérdie resensent met die rolprent het, is dat dit pragtig lyk, maar daar is nie genoeg hart en warmte in nie. ʼn Mens kyk tegnies van buite af daarna. Tog, visueel is dit pragtig. Die stelle lyk mooier as Hansie en Grietjie se lekkergoedhuisie, en die musiek (ook die wat oorspronklik vir die rolprent gekomponeer is), is natuurlik uit die boonste rakke.

ʼn Mens kan jouself (en jou objektiwiteit) heeltemal verloor in die visuele oordadigheid in 3-D, maar dit is al wat die fliek uiteindelik is: mooi prentjies met asemrowende stelle en lekker-luister-musiek. Mackenzie Foy as Klara is ook ʼn vars ontdekking. (Sy het al tevore in flieks gespeel.) Sy speel uit haar hart uit, maar die twee regisseurs kom nooit werklik by daardie hart uit nie.

Die rolprent gaan oor Klara wat ʼn Neutekraker-pop ontdek. Maar die koninkryk word bedreig deur die Sugarplum Fee wat ʼn wrok teenoor haar suster koester en alles en almal (insluitend ʼn weermag muise, nie rotte soos in die ballet nie) wil vernietig.

Rekenaars het die grootste dele van die rolprent gemaak met spesiale effekte wat jou asem sal wegslaan. Verwag dus ʼn visuele skouspel, maar nie altyd die warmte en deernis vir die karakters wat jy voel as jy na die ballet gaan kyk nie.

The Nutcracker and the Four Realms wys tans by SterKinekor en NuMetro

Leon van Nierop resenseer weekliks rolprente soos hierdie een op kamera wat op sy Facebook-blad. Besoek ook sy blad vir resensies oor rolprente met lokprente en interessante feite.

Leon van Nierop

Meer oor die skrywer: Leon van Nierop

Leon van Nierop is ’n bekende radiopersoonlikheid, rolprentresensent, vryskutjoernalis, stemkunstenaar, skrywer van romans, radio- en TV-vervolgverhale soos Wolwedans in die skemer en Ballade vir ’n enkeling asook die draaiboeke van die rolprente geskoei op hierdie twee verhale. Hy was vier jaar lank hoof van die Rolprentakademie van die Tshwane-Universiteit van Tegnologie en tree dikwels as dosent en spreker oor rolprente op. Sy boek oor die geskiedenis van die Afrikaanse rolprenbedryf, Daar doer in die fliek, is verlede jaar uitgegee. Sy jongste romans, Sielsmokkelaar en Stralerjakkers, verskyn later vanjaar.

Deel van: Flieks

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

Linda ·

Ek het gaan kyk omdat ek gedink het die “skouspel” kan goeie vermaak wees na ‘n rowwe werksdag, maar ek was baie teleurgestel. Die akteurs is koud en kil, daar is nie passie in nie. Klein dogtertjies sal dit dalk geniet maar ek sou dit nie aanbeveel nie.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.