Space Jam: A New Legacy het die naweek skoonskip gemaak by die Amerikaanse loket. Die fliek het $31, 6 miljoen (sowat R462 miljoen) in sy openingsnaweek verdien.
Met ʼn gesamentlike stromingsuitreiking het dit ʼn nuwe pandemie-era-rekord vir ʼn gesinsrolprent opgestel.
Die aksiebelaaide rolprent wat handel oor basketbal, is die opvolg van die 1996-rolprent met Michael Jordan. Hierdie keer snoer LeBron James kragte saam met die Looney Tunes-karakters om sy seun te red.
Ten spyte van slegte resensies onttroon Space Jam: A New Legacy die Marvel-fliek Black Widow. Dié superheldavontuur, met Scarlett Johansson as die Russiese spioen Natasha Romanoff, het $26,3 miljoen (sowat R382 miljoen) in sy tweede naweek verdien.
Dit is ʼn skerp daling van 67% van die $80 miljoen (sowat R1,16 miljard) wat die fliek verlede naweek in sy openingsnaweek verdien het. Dié rolprent was toe die winsgewendste fliek wat tot dusver post-Covid-19 uitgereik is.
In die derde plek is Sony se psigologiese riller Escape Room: Tournament of Champions, met ʼn inkomste van $8,8 miljoen (sowat R128 miljoen).
Die vierde plek word ingeneem deur Universal se F9: The Fast Saga met $7,7 miljoen (sowat R111 miljoen) en die vyfde plek deur Universal se Boss Baby: Family Business met $4,7 miljoen (sowat R68 miljoen).
In die sesde plek is The Forever Purge met $4,1 miljoen (sowat R59 miljoen), in die sewende plek is A Quiet Place: Part II met $2,2 miljoen (sowat R32 miljoen) en in die agtste plek is Roadrunner met $2 miljoen (sowat R29 miljoen).
In die negende plek is Cruella met $1,2 miljoen (sowat R17 miljoen) en in die tiende plek is Pig met $970,000 (sowat R14 miljoen).
Bron: BBC