Die gewilde televisiereeks, Ballade vir ‘n enkeling, herleef nie nou net op die grootskerm nie, maar die musiektreffers uit die reeks kry ook ‘n splinternuwe baadjie. Foto: Verskaf.
Draaiboek: Leon van Nierop
Regisseur: Quentin Krog
Vervaardigers: The Film Factory – Danie Bester
Rolverdeling: Armand Aucamp, Rolanda Marais, Jacques Bessenger, Donnalee Roberts, Edwin van der Walt, Christia Visser, Luan Jacobs
Ouderdomsbeperking: 16 (taal, geweld, seksuele geweld)
Datum van vrystelling: 20 Maart
In die internasionale rolprentbedryf, en meer spesifiek Hollywood, is daar rolprente wat ʼn omkeerpunt in die bedryf veroorsaak het. ʼn Rolprent wat veroorsaak het dat die daaropvolgende rolprente volgens ʼn nuwe standaard moet wees en die gehoor honger gelos het vir nog sulke flieks. Vir ons rolprentbedryf is dit Ballade vir ʼn Enkeling.
Ballade vir ʼn Enkeling is gegrond op die uiters gewilde televisiereeks in die 80’s, maar in hierdie fliek kry die storie van Leon van Nierop ʼn splinternuwe baadjie. Dit vertel die storie van die skrywer Jacques Rynhard wat verdwyn op die aand wat hy ʼn groot literêre prys ontvang. ʼn Joernalis, Carina Human, besluit om ondersoek in te stel en besef vinnig dat daar baie geheime is wat agter die verdwyning skuil.
Die rolverdeling is sterbelaai met akteurs soos Rolanda Marais (Lena Aucamp) Donnalee Roberts (Carina Human), Armand Aucamp (Jacques Rynhard), Jacques Bessenger (Jan-Paul Otto) en Helene Lombard (Liebet Rynhard). Elkeen van hierdie akteurs is fantasties in hul onderskeie rolle, maar dit is egter die jong akteurs wat die gehoor gaan verras.
Edwin van der Walt vertolk die rol van Jacques Rynhard (jr.) en die jong akteur maak ʼn mens ongelooflik opgewonde vir wat hy vir die bedryf kan doen. So ook met Christia Visser (Lena Aucamp jr.) en Luan Jacobs (Jan-Paul Otto jr.).
Daar is egter nie een akteur in hierdie fliek wat nie spesiale erkenning verdien nie. Miles Petzer in die rol van Gert Grové gaan jou hare laat rys en Cindy Swanepoel is moeiteloos skreeusnaaks as Mysi Moolman.
Die kinematografie is beeldskoon gedoen en staan terug vir niks (nie eens vir internasionale flieks soos Gone Girl en Birdman nie).
Quentin Krog is geen vreemdeling in die rolprent- en televisiewêreld nie en het meer onlangs in die regisseurstoel gesit vir die televisiereeks Sterlopers. Krog se benadering met die regie van Ballade vir ʼn Enkeling is uiters verfrissend.
Die oorspronklike musiek van die televisiereeks asook nuwe weergawes daarvan word gebruik en is propvol nostalgie wat jou hoendervleis gaan gee.
Ongeag of jy die televisiereeks gekyk, net daarvan geweet of geen benul het waaroor dit gaan nie: hierdie fliek gaan jou bekoor en mag nie misgeloop word nie.
Ballade vir ʼn Enkeling is die begin van groot dinge vir ons rolprentbedryf.
Mag nie misgeloop word nie, werklik? Het dit op uitnodiging van vriende saam gaan kyk. Om dit in een woord op te som: Anachronisme. Die kinematografie is goed, maar hoekom met minder tevrede wees, dis tog 2015, en laat mens plek-plek voel of dit eerder ‘n advertensie is waarna jy kyk. Die reënmasjien was seker duur om te huur, derhalwe die klomp tonele met stortreën in? Die storielyn en agtergrond van stoomtreine ensovoorts is nie suksesvol oorgeplant na ons hedendaagse tydgreep nie. Die seuns as skoolkinders blaai ‘n Loslyf deur, kamtig circa 1996, maar is nog onderworpe aan lyfstraf? Lyfstraf in skole was toe reeds ongrondwetlik, maar die haarstyle van die jong akteurs sou nietemin selfs in ’96 verboten gewees het. Die skoolboelie se Engelse aksent is steurend, hy kan skaars ‘n opstel skryf, maar as volwassene is die karakter skielik 100% Afrikaans en daarby ‘n redakteur? Komaan! Die grafiese verkragtingstoneel is oorbodig, net soos die onnodige gevloek om dit meer eietyds en vatbaar vir ‘n nuwe geslag te maak. Dis ook te betwyfel of daar in die tydvak waarin die film afspeel nog blanke stokers bestaan het, en sulke tawwe verbeteringskole. Geen hof sou ook die jong Rynhard skuldig bevind het aan moord vir ‘n ooglopende ongeluk nie. Soos iemand opgemerk het, dit voel die eerste 5 minute of die hele 7de Laan in die fliek speel. Nee wat, die ou reeks was puik maar hierdie evolusie daarvan is ongeslaagd.
Ag komaan…..die fliek was puik! Jy is seker een van die arme siele wat glad nie kan ontspan en sommer net die lewe geniet nie!
Ag komaan…..die fliek was puik! Jy is seker een van die arme siele wat glad nie kan ontspan en sommer net die lewe geniet nie!
Die beste Afrikaase fliek ooit. Hou so aan….
Ek het ook gevoel daar is te veel anachronismes om my werklik in die storie in te trek. Dit sou beter gewerk het as die kinders jonk was in die 1970’s. En die fliek is te lank. Maar ja, pragtige kinematografie met ‘n kontemporêre en vars aanslag.