Die nuwe weergawe van Disney se The Lion King het tydens sy afgelope openingsnaweek ʼn allemintige $185 miljoen in die VSA ingeoes en nóg $269,4 miljoen in kaartjieverkope wêreldwyd.
Daar is geen twyfel daaraan dat 2019 se loketrekords aan Walt Disney Co. behoort nie. Afgesien van The Lion King wat in sy openingsnaweek rekords laat spat het, het Avengers: Endgame ook Avatar verbygesteek om die rolprent te word wat nog die meeste inkomste ooit verdien het.
The Lion King het die afgelope naweek in 4 725 rolprentteaters in die VSA begin draai. Fliekgangers het na teaters gestroom om van die eerstes te wees om die nuwe weergawe van hierdie geliefde animasierolprent van 1994 te sien, maar die rolprent het egter gemengde reaksie uitgelok.
Die vervaardigers van die nuwe weergawe van The Lion King het die nuutste tegnologie gebruik om die rolprent so realisties moontlik te laat lyk. Die stemme van die karakters word ook deur groot name in die vermaakbedryf gedoen, onder wie Beyoncé, Donald Glover, James Earl Jones en Seth Rogan.
“Ons het ʼn uitmuntende vertoning die naweek gehad,” het Cathleen Taff, Disney se president van verspreiding, gesê. “Ons het geweet ons het hier iets regtig spesiaal beet weens die fliek se gewildheid onder alle ouderdomme.”
Dit is die tweede keer vanjaar dat die Disney-handelsmerk kritici se flou reaksie op ʼn rolprent oorheers het. Aladdin, wat nie juis jubelende resensies ontvang het nie, is steeds in die top-10 rolprente ná nege weke in teaters en kan reeds met $989 miljoen wêreldwyd spog.
“Sekere handelsmerke het soveel goedhartigheid en gelykheid. Resensies maak duidelik net nie saak nie,” het Paul Dergarabedian, senior media-ontleder vir Comscore, gesê.
Wanneer daar gekyk word na die volle tien dae wat The Lion King al in rolprentteaters vertoon word (die fliek is ʼn week vroeër in China bekendgestel), het die rolprent wêreldwyd al meer as $531 miljoen ingeoes. Volgens berigte het die fliek sowat R24,5 miljoen tydens sy openingsnaweek in Suid-Afrika verdien.
Fliekgangers het ook gestroom om die fliek in grootformaat en 3D te kyk – 36% van die wêreldwye inkomste kom uit 3D-vertonings en $25,2 miljoen van IMAX-teaters.
Disney kan nou spog met vyf van die topses-posisies vir die jaar. Avengers: Endgame het uiteindelik Avatar se rekord van die meeste inkomste ooit verbygesteek met $2,79 miljard.
Hier is die geraamde inkomste uit kaartjieverkope van Vrydag tot Sondag:
Rolprent | Inkomste VSA en Kanada | Inkomste res van die wêreld | |
1 | The Lion King | $185 miljoen | $269,4 miljoen |
2 | Spider-Man: Far From Home | $21 miljoen | R37,2 miljoen |
3 | Toy Story 4 | $14,6 miljoen | $25,8 miljoen |
4 | Crawl | $6 miljoen | $2,7 miljoen |
5 | Yesterday | $5,1 miljoen | $4,3 miljoen |
6 | Stuber | $4 miljoen | $1,1 miljoen |
7 | Aladdin | $3,8 miljoen | $9,2 miljoen |
8 | Annabelle Comes Home | $2,7 miljoen | $7,4 miljoen |
9 | Midsommar | $1,6 miljoen | $584 000 |
10 | The Secret Life of Pets 2 | $1,5 miljoen | $6,7 miljoen |
Saam met my dogtertjie gaan kyk. Dit was presies soos die eerste een!
Ek het vanog die temalied gehoor, beyonce sing dit. Dit was TERRIBLE!!!!!