Irene-Louise van Wyk, treffermaker van “Hou jou hande van my lyf af”, is Sondag met Nicolas du Preez, ʼn houtinspekteur, getroud.
Louis van Wyk, musiekpromotor en Irene-Louise se pa, het aan Maroela Media bevestig die troue het buite Pretoria op die Galagos-landgoed plaasgevind.
Van Wyk het verklap dat sy dogter sonder sy medewete al jare lank haar ma, die ontslape gospelsangeres Irene van Wyk, se trourok bewaar het sodat sy gedeeltes daarvan by haar eie trourok kon laat inwerk. “My dogter het soos ʼn prinses gelyk in haar rok,” het Van Wyk gesê.
Leandie du Randt Bosch, aktrise en vriendin van Irene-Louise, het haar lyf seremoniemeester gehou tydens die spoggeleentheid. Hykie Berg, akteur en motiveringspreker, het die tafelgebed gedoen.
“Pieter Koen, wat vir my en Irene-Louise baie goed ken, het die heildronk op ons ingestel,” het Van Wyk vertel.
Dit was ʼn sterbelaaide gastelys vir dié blonde popster en haar pasgetroude man. Die voormalige Mej. SA, Melinda Bam, die manne van die popmusiekgroep Adam, Reynardt Hugo, Hugo Ludik en Kyle Grant was saam met Anlia van Rensburg, bekend vir haar rol as Sasha in die kykNET-sepie Getroud met rugby, Bouwer Bosch en die grapjas en sosialemediavlinder Craig du Toit Nel gaste op die troue.
Die paartjie beplan om vir ʼn week uit te span by Bakubung Bush Lodge voordat die sangeres saam met Du Toit Nel op ʼn landswye toer vertrek.
Irene-Louise se jongste enkelsnit, “Is jy spyt”, word die komende week uitgereik. Dié snit is vir haar geskryf deur die gewilde Afrikaanse sangeres en liedjieskrywer Riana Nel.
Pragtige mens. Met groot talent. Baie geluk.☺
Gróót ja!
En daar vergeet ek skoon ek wou nog die bruidspaar geluk, vrede en bo alles vir-altyd liefde toewens. Irene-Louise, jy is ‘n pragtige bruid; jou ma sou so trots wees op jou.
Pragtig. Veels geluk!
Sy is so ‘n pragtige jong mens met baie talent en ‘n hartjie van goud. Veels geluk! Jy lyk soos ‘n sprokie prinses
Sjoe, maar die bruid lyk soos ‘n sprokieskoningin. Baie seënwense vir julle.
Jy het pragtig gelyk… ek was mal oor Ma Irene se musiek, en kan sien dat jy in Mamma se voetspore sal volg… Baie geluk aan jul, mag jul Huwelik net vol Blessings wees, als wat mooi is.