Karen Zoid en Leah se nuwe enkelsnitte vaar albei só goed dat die liedjies vir dié twee sangeresse ʼn stewige plek op dié week se Maroela Media Afrikaanse Top‑20 besorg het.
Karen Zoid se enkelsnit “Donker nag” vanaf haar album Op die oomblik, is vandeesweek in die 16de posisie, terwyl Leah se “Kyk na my” die 20ste posisie beklee.
Eintlik kan Zoid vir albei dié snitte haarself ʼn klop op die skouer gee – “Kyk na my” is deur haar en Johan Vorster geskryf. Leah het voorheen verduidelik die liedjie gaan daaroor dat almal op ’n tydstip in hulle lewens op ’n weerlose plek kom, maar ook dat daar altyd hoop is.
“Weerloosheid is deel van menswees en ek dink almal was al daar. Johan en Karen het hierdie konsep gebruik om ‘Kyk na my’ te omskep in ’n liedjie waarmee almal kan vereenselwig. Die opbou na die einde van die snit is ongelooflik. Nie net is die woorde bittermooi, rou en waar nie, maar die produksie is ook hoendervleis mooi,” het sy gesê.
Ricus Nel en Snotkop behou hul nommer 1‑posisie vir die 9de agtereenvolgende week.
In vandeesweek se Maroela Media Afrikaanse Top‑20 is daar sewe snitte wat styg, sewe wat daal, vier wat onveranderd bly en twee nuwe liedjies wat die week hul toetrede tot die Top‑20 maak.
- Ricus Nel ft Snotkop – “Boerepompie”
- Willem Botha – “Een shot”
- Riana Nel – “Hou die hemel oop”
- Elandré – “Tussen die lakens”
- Christia Visser – “17 Shots”
- Elandré – “Vuur op die water”
- Janie Bay – “Amper daar”
- Elvis Blue & Theuns Jordaan – “Jou huis”
- Jo Black – “Bitter”
- Dewald Wasserfall – “So sterk soos ’n vrou”
- Biggy – “Dames”
- Theuns Jordaan – “Praat is te laat”
- Robbie Wessels & Appel – “Staan saam”
- Tasché – “Die een”
- JohnJames – “Ek is meer werd”
- Karen Zoid – “Donker nag”
- Dirk van der Westhuizen – “Lusmakertjie”
- Demi Lee Moore – “Mis eet slaap herhaal”
- Jo Black – “Voel jy die genade”
- Leah – “Kyk na my”