Deur Driaan van Rooyen, beter bekend as Prop
Met die groot sukses van verlede jaar se konsert, kon ons nie anders as om dit weer die jaar aan te bied nie. Op 3 September maak ons dus weer so.
Baie mense vra hoekom die naam “LIG”? Want LIG staan vir “Liefde In Gestremdheid” – ons gee om, ons reik uit, ons maak bewus en ons maak sterker!
Met die stigting van die LIG-konsert in 2021 was die gedagte van die begin af om bewusmaking en fondsinsameling effens anders aan te pak. Ek, saam met die Helpende Hand-span, het gesit en mooi gedink wat die eintlike doelwit van so ʼn konsert moet wees.
Ons het besef dat in plaas daarvan om ʼn konsert te hou vir mense wat leef met gestremdhede, ons graag net ʼn konsert wou hou as verteenwoordigers van mense wat leef met gestremdhede. Ons wil dus ʼn dinamiese geleentheid skep nie net om die Afrikaanse musiekbedryf te vier soos net ons kan nie, maar ook om ʼn klein blik op die uitdagings van leef met gestremdhede te vertoon, maar tog ook wys dat ons gestremdheid ons glad nie terughou nie.
Die kunstenaars is met die hand gekies om hoop te saai, ʼn boodskap van hou moed oor te dra, maak nie saak wat jou kant toe kom nie.
Saam met my op die verhoog gaan Ruhan du Toit, Mathys Roets, Monique Steyn, Vernon Barnard en Rochelle Veenemans wees, met Eric Holm as seremoniemeester.
Die fondse wat met die kaartjieverkope ingesamel word, gaan direk teruggestort word in die LIG-studiefonds. Studente met gestremdhede se studiekoste is heelwat hoër en hulle het meer as net die gewone uitgawes. Hulle het unieke uitdagings en het onder andere ʼn tolk, spesiale vervoer, rekenaartoerusting en so meer nodig. Die fonds se hoofmandaat is dus om die finansiële uitdagings van studente met gestremdhede te verlig. In die opsig is Helpende Hand se uitgangspunt om hande te vat met geregistreerde tersiêre instellings sodat die finansiële ondersteuning wat ons bied, volhoubaar uitgevoer kan word.
Waaraan daar egter geen tekort is nie, is talent. Myns insiens neem ʼn persoon wat met gestremdheid leef soms meer waar, wat hulle unieke kandidate vir spesifieke beroepe maak. Om as kind in ʼn rolstoel stil te sit het my waarnemingsvermoë ontwikkel. Vir my was dit my droom om ʼn argitek te word. Dit is ʼn beroep waarin skerp waarneming uiters belangrik is, met baie minder fisieke uitdagings.
Kom saai hoop, en vier die aand saam met ons!
Indien jy hier lees en wel ʼn bydrae wil maak, kom geniet die LIG-konsert saam met ons. Die geleentheid vind op 3 September om 17:00 by Sol-Tech Monumentpark-kampus plaas. Bespreek nou jou kaartjies.
Sou jy dit graag nog ʼn stappie verder wou neem deur met Helpende Hand en die LIG-studiefonds hande te vat om van die geleentheid nog ʼn groter sukses te maak, kan jy gerus vir René Roux by [email protected] kontak.
Ons spreek ons opregte dank uit teenoor die volgende persone en instansies wat reeds hand opgesteek het om deel van hierdie hoopsaai‑storie te wees!
- Maroela Media:
- Yolande van der Westhuizen Audiologists
- AfriForum TV
- Reinhardt Transport
- Jacques Smith Skillfulltraining
- Afrison LED
Koop jou kaartjies vandag nog!