Luister: 11-jarige met engelstem bekoor gehore

Scott Engelbrecht kuier in die Maroela Media-ateljee. (Foto: Maroela Media)

Scott Engelbrecht kuier in die Maroela Media-ateljee. (Foto: Maroela Media)

Op 11-jarige ouderdom is die sanger Scott Engelbrecht geen vreemdeling op die verhoog nie en is hy slaggereed om met sy kinderskoene diep spore te trap in die Suid-Afrikaanse musiekbedryf.

Scott was ses toe sy ouers sy sangtalent ontdek het. Hy het na ʼn Paul Potts-rolprent sit en kyk en het die Italiaanse woorde van die liedjies in die fliek nagemaak.

Hy vertel in ʼn onderhoud met Maroela Media dat hul klavierstemmer eendag vir sy ouers gesê het dat hy musieklesse moet neem nadat sy hom hoor sing het.

“Sy het voorgestel ek kom by Yulia Patrascoiu uit, en ek neem tot vandag toe nog lesse by haar,” vertel dié jong sanger oor hoe sy paaie met dié van die bekende Russiese operasangeres gekruis het. Malie Kelly, ʼn bekende in die plaaslike musiekwêreld, het hom ook onder haar vlerk geneem.

“Klassieke musiek is vir my die mooiste musiek en ek voel dit is ook die musiek wat die beste by my stem pas,” sê Scott. Hy het verlede jaar sy eerste selfgetitelde album uitgebring met sy weergawes van treffers soos “O mio babbino caro”, “Funiculi funicula” en “Ave Maria”.

“How Great Thou Art” en “Oh Holy Night” verskyn ook in die album saam met “Jerusalem”. ʼn Musiekvideo van “Jerusalem” is ook op YouTube en plaaslike televisiekanale te sien.

Gé Korsten is een van Engelbrecht se helde en hy het onlangs die geleentheid gekry om deel te wees van ʼn groot Gé Korsten-huldeblykkonsert, Gé Sing: Hoor my lied. Korsten se treffer “Sonder jou” is ook in Engelbrecht se album te hoor.

Dié konsert is by Carnival City se Big Top Arena aangebied en Engelbrecht het saam met sterre in die bedryf soos André Schwartz, Louis Loock, Arina de Witt, Jannie Moolman en Tasché van The Voice-faam opgetree.

“Dit was vir my só lekker om deel te wees van hierdie konsert. Die mense het my baie tuis laat voel en dit was die wonderlikste ervaring,” sê hy.

Scott, ʼn Gautenger, wat ook einde verlede jaar in die Kersfees Skouspel in Pretoria en Kaapstad saam met die internasionale kunstenaar Leo Sayer te sien was, vertel hy beplan nie om binnekort weer ʼn vollengte album uit te bring nie.

“Ons beplan eerder om elke twee maande ʼn enkelsnit uit te reik,” sê hy opgewonde.

Kyk hier na Scott Engelbrecht se video van “Jerusalem”.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

14 Kommentare

jongste oudste gewildste
Rika

WOW, die seun het n stem aan hom… Baie baie mooi. Wardeur jou talent seun dis n spesiale geskenk van God

Wenner

Hoendervleismooi!!!!

Marietjie

Dis eenvoudig fantasties! Ek wil ál sy liede hoor.

Charles

Joh – ek is STOMGESLAAN!

Johanna Botha

Trane in my oë …..PRAGTIGGGG ! !