Martin Bester-konsert gekanselleer ná Jacaranda-storm

Martin Bester (Foto: Facebook)

ʼn Restaurant in Lephalale (Ellisras) het ʼn optrede deur Martin Bester weens “negatiewe publisiteit” gekanselleer twee weke voor dié sanger daar sou optree.

Die sanger was veronderstel om op 29 September ʼn vertoning by die Elephant Bull-sportkroeg in dié dorp te lewer.

Gerhardt Theron, ʼn bemarkingsbestuurder vir die restaurant, het Dinsdag aan Maroela Media bevestig die konsert is gekanselleer. Theron het gesê die restaurant het dié besluit geneem weens “slegte publisiteit en terugvoer van inwoners van die dorp” nadat ʼn storm onlangs om Bester en Tumi Morake, sy mede-aanbieder op JacarandaFM se ontbytprogram, se koppe losgebars het.

Morake het tydens die radiostasie se ontbytprogram op 12 September wit mense met boelies op ʼn speelterrein vergelyk. Haar uitsprake het gevolg tydens ʼn gesprek oor ʼn konsert in Nieu-Seeland wat glo gekanselleer is weens Steve Hofmeyr se betrokkenheid. Morake het tydens die gesprek gesê sy raak emosioneel wanneer swart mense by sulke gesprekke betrek word, omdat swart mense jare lank onderdruk is en “deur ʼn spesifieke groep mense geleer is hulle is minder as mense”.

Bester was nie in dié tyd direk by die uitlatings betrokke nie, maar is deur talle luisteraars en aanhangers gekritiseer omdat hy glo nie in die bres getree het vir wit mense nie.

“Ons het Bester wel maande gelede bespreek, maar ons was genoop om die konsert te kanselleer weens die negatiewe publisiteit wat tans met die sanger gepaard gaan. Ons het sy agent gekontak, en hulle het ten volle verstaan,” sê Theron.

Hy sê die sanger is tans in samesprekings met die restaurant om ʼn deposito aan hulle terug te betaal wat vroeër aan hom uitbetaal is. Theron sê ʼn verwysing in die restaurant se verklaring, wat lui “wees trots en share hierdie boodskap”, is nié op Bester gemik nie.

“Die stelling is gemik op die inwoners van Ellisras sodat hulle die boodskap kon versprei, en nie ʼn verwysing na Bester in enige sin nie. Ons wou bloot nie die negatiewe publisiteit hê nie.”

Martin Bester-konsert gekanselleer ná Jacaranda-storm (Foto: Facebook)

Corné Oosthuizen, Bester se agent, het bevestig dat die konsert gekanselleer is. Oosthuizen sê Theron het gesê die kansellasie is “vanweë die plaaslike gemeenskap se boikot teenoor JacarandaFM wat oorspoel na die restaurant” nadat dié restaurant die optrede geadverteer het.

Die vakbond Solidariteit het op 15 September ʼn memorandum aan JacarandaFM gestuur waarin die vakbond sekere voorstelle aan die stasie voorhou rakende die omstredenheid rondom een van sy omroepers se uitlatings.

Solidariteit vra in die memorandum dat JacarandaFM die volledige ontbytprogram beskikbaar stel en nie slegs die vooraf geredigeerde vyf minuut lange klankgrepe nie; dat JacarandaFM verskoning vra aan luisteraars wat aanstoot geneem het; dat die nodige maatreëls ingestel word om die toekomstige misbruik van die JacarandaFM-platform vir eensydige politieke sienings te voorkom en dat die nodige stappe teen Morake geneem word weens die misbruik van die JacarandaFM-platform.

Dr. Dirk Hermann, bestuurshoof van Solidariteit, het Dinsdag gesê die stasie het nog tot Dinsdagmiddag tyd om op die memorandum te reageer. “Afhangend van hulle reaksie, sal ons besluit hoe die pad vorentoe gaan lyk,” sê Hermann.

Hy sê die kansellasie van Bester se konsert is maar net een van die bewyse dat mense se frustrasies hanteer moet word en nié geïgnoreer moet word nie. “Die reaksie was baie wyer as bloot die uitlatings op die stasie. Daar was ʼn onderliggende sweer wat stukkend gemaak is. Solidariteit is geensins betrokke by die kansellasie van die konsert nie, maar dit is ʼn bewys van mense se onderliggende woede. Daar moet gereageer word op dié woede en die dinge wat gesê is. Dit is ʼn bewys van mense wat uitskree om gehoor te word en die woede wat deursypel moet op ʼn behoorlike manier hanteer word.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

63 Kommentare

jongste oudste gewildste
Eish

Ja née, jy kan nie verwag ek moet bly dans met jou as jy aanmekaar my tone raaktrap nie, né.

Kom Ons Boks

Dit is tyd vir Jacaranda en Martin om reg te kies maar ek vermoed hy (asook Riaan) was/is heel in sy skik met Tumi se drog rasisme. Ek is wel bly dat Jacaranda se ware kleure binnekort ontbloot sal word. Ons staan bankvas agter Solidariteit!

A. Mac

Ek wonder of dieselfde ook gaan gebeur op Polokwane want volgens wat ek verstaan gaan hy daar ook ‘n konsert hou.

HENNA

Bly dit is gekanselleer ….. Jacaranda nie meer wat dit was nie

jack daniel

Hoera!!!!!! Ellisras!!! Hoera!!!
Goed gedaan om by jul standpunt te staan!!!
Boycot jacfm en sy trawante!!!
Hoera!!!!!!! ?