Steve Hofmeyr (Foto: Facebook/Steve Hofmeyr)
Steve Hofmeyr se jongste album is skaars bekend gestel of dit pronk op treffersparades landwyd.
Die sanger het hom onlangs tot sosiale media gewend om aanhangers te bedank vir hul ondersteuning met dié album.
“Daar hoop my skuld weer by jou [die aanhanger] op. My album is goud voor hy die winkels bereik. Dit het lanklaas gebeur – dankie duisend. Ek’s só in my noppies oor Skree se ontvangs. Ek kon dit toets in Bloemfontein, Kraaifontein en Clanwilliam waar daar elke aand gou ʼn yslike tekort was. Die nuwe konsert het sommer baie meer energie, minder praatjies en pragtige prentjies agter my,” het hy laat hoor.
Die sanger het Maandag ʼn agter-die-skerms-kykie van die liedjie “Feeslied”, die jongste enkelsnit vanaf die nuwe album, op sosiale media gedeel. Hofmeyr het Sefako Makgatho-rylaan (voorheen Zambesi) vroeër in Oktober tot stilstand gebring toe hy die musiekvideo vir dié liedjie in spitsverkeer binne ʼn paar uur geskiet het. Die video vir dié liedjie is vandeesweek al bykans een miljoen keer gekyk.
Skree is vroeër vandeesmaand met ʼn toekenning bekroon nadat dit goue status behaal het nog voor dit in winkels bekend gestel is.
Die sanger het die afgelope naweek ook ʼn foto op Twitter gedeel waar sy album oënskynlik die nr. 1-verkoper is.
Skree is die sanger se 30ste album. Sy nuutste boek, Die onaantasbares, is ook nou op Amazon te koop.
lekker man lekker