Video: Andrea Bocelli en seun se duet roer die hartsnare

Andrea en Matteo Bocelli (Skermgreep uit die video)

Andrea Bocelli is wêreldwyd een van die bekendste name in musiekkringe en dit wil voorkom of sy seun Matteo dié talent geërf het. Die twee het vir die eerste keer ŉ duet saam opgeneem en dit is ŉ vertoonstuk van hul hegte verhouding as pa en seun.

Die Bocelli’s roer beslis aanhangers se hartsnare met die video “Fall on Me” wat Andrea op sy 60ste verjaarsdag op 22 September 2018 op sy amptelike YouTube-kanaal gedeel het.

ŉ Paar intieme familiefoto’s van Matteo se kinderjare vorm deel van die beeldmateriaal in die musiekvideo waar Andrea en Matteo in Engels en Italiaans sing. Matteo vier in Oktober vanjaar sy 21ste verjaarsdag. Die twee het ŉ paar liedjies saam opgeneem vir Andrea se nuwe album, “Si”.

“Fall on Me” sal ook as klankbaan gebruik word tydens die laaste rolverdeling van die nuwe Disney-fliek, The Nutcracker and the Four Realms.

“Enigiemand wat ŉ ouer is, enigiemand wat weet wat die kosbare verantwoordelikheid is om ŉ ma of ŉ pa te wees, sal die volle betekenis van dié stuk verstaan,” het Andrea gesê. “‘Fall on Me’ is die eerste duet saam met my seun Matteo Bocelli.”