Video: Margot streef na internasionale klank in Afrikaans

Margot, die donkerkopsangeres wat die land laat regop sit het met haar weergawe van Francois van Coke en Karen Zoid se “Toe vind ek jou” vir die fliek Fiela se kind, se lankverwagte debuutenkelsnit is pas uitgereik.

Die musiekvideo vir die snit getiteld “Tydelike afleiding” is vandag (Vrydag) vir die eerste keer op Maroela Media te sien.

Margot is die jonger suster van die musikant Loki Rothman en al is sy gereeld saam met hom op die verhoog te sien, is sy slaggereed om haarself as kunstenaar uit eie reg in die Afrikaanse musiekbedryf te vestig.

Sy vertel sy kon dit skaars glo toe Sony Music vir haar ʼn platekontrak aanbied. “Dit was nog altyd my grootste droom om ʼn sanger te word. Ek bewonder nog altyd my broer, hoe hy op die verhoog optree en hoe hy musiek skryf. Toe ek die oproep [van Sony Music af] kry, was ek so geskok. Ek kon nie glo dat hierdie klein meisie van Bellville nou ook die kans kry om haar eie musiek te laat hoor nie.”

As 19-jarige wou sy graag ʼn jonger Afrikaanse mark bereik en het baie ure in die ateljee deurgebring om “Tydelike afleiding” se internasionale klanke af te rond.

“Internasionale kunstenaars soos Billie Eilish en Julia Michaels beïndruk my baie en ek wou graag die klank wat hulle het, in ʼn Afrikaanse liedjie laat werk. Dit was vir my belangrik om nie die gewone resep van Afrikaanse treffers te volg nie. Die musiekvervaardiger by Sony het na my geluister en ek dink ons het iets ongeloofliks saamgestel – ek is eintlik verbaas oor hoe goed dit klink!” sê Margot.

Sy vertel sy het die liedjie geskryf toe sy ʼn liefdesteleurstelling beleef het. “Ek het baie vreemde gedagtes gehad en wou dit graag neerskryf. Gewoonlik was dit vir my moeilik om sinvolle lirieke in Afrikaans te skryf, maar ek het eendag net voor die klavier gaan sit en die woorde en melodie het gevloei. Ek het my eerlike, rou gedagtes neergeskryf en só het die liedjie ontstaan.”

Margot. (Foto: Verskaf)

Al glo sommige mense dat sy in haar broer se skadu leef, voel sy nie so nie, sê sy. “My familie het nog altyd vir my gesê my kans om alleen te staan sal kom en ek het daarvoor gewag. Ek het hard gewerk om in staat te wees om op my eie voete in die bedryf te staan.

“My broer gun my gereeld die kans om saam met hom ʼn verhoog te deel en dit is vir my so lekker, want ek is so lief vir hom en sy musiek, maar met hierdie liedjie wil ek wys: Hier is ék, die regte Margot. Mense vra my gereeld wanneer stel ek iets op my eie vry, so vir daardie mense wil ek sê, hier is dit nou!”

Sy lag as sy vertel hoe haar broer haar soms met ʼn ysterhand aanmoedig om haarself as kunstenaar te ontwikkel. “As ek soms net ʼn dag af vat en besluit om in die bed te lê en na reekse te kyk, sal hy my streng vra hoekom ek nie skryf of besig is om te skep nie.”

Margot is die laatlammetjie in haar gesin en tien jaar jonger as Loki. Hulle het ook ʼn ouer suster, Grethe.

“Ná skool het Loki begin agterkom ek is nie meer ʼn baba nie en dat ek ʼn paar dinge van die lewe verstaan en ons het al hoe meer met mekaar begin deel. Die ouderdomsgaping tussen my en Loki is groot, maar ons deel nog altyd ʼn liefde vir musiek en ons passie daarvoor het ons gehelp om ʼn sterk verhouding te bou.”

Sy vertel die volgende droom wat sy wil najaag, is om ʼn vollengte-album op te neem. “Ek wil eers kyk hoe mense die klank van my liedjies ontvang, maar die inperking het my beslis geïnspireer om selfondersoek te doen en meer te skryf. Ek sien baie uit daarna om binnekort weer in die ateljee te wees om nog musiek op te neem.”

Die groot verhoë van die wêreld wink ook vir haar, sê sy. “Ek het al van kleins af geweet ek wil iets doen op die verhoog of voor ʼn kamera. Om voor mense te staan en my passie uit te leef, laat my lewendig voel.”

“Tydelike afleiding” is op alle groot digitale platforms beskikbaar.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae