Die tweede seisoen van Die Kontrak, die sangkompetisie wat sowat vier jaar gelede die loopbaan van onderskeidelik Demi Lee Moore, Ivan Roux en Wilha Carstens afgeskop het, sal eersdaags weer op die kassie te sien wees.
Die Kontrak 2 sal vanjaar op e.tv uitgesaai word en ʼn platekontrak van R1 miljoen van Coleske Artists is weer op die spel.
Vanjaar se mentors is Karlien van Jaarsveld, Tarryn Lamb, Refentse en Monique Steyn. Hulle gaan help soek na die Afrikaanse musiekbedryf se volgende groot ster.
Jo Black, Corlea Botha en Barry Pretorius sal as kenners optree.
Die inskrywings vir die kompetisie is amptelik oop en sluit op Vrydag 29 April. Die program word vanaf Augustus vanjaar uitgesaai.
“Dit is nou jou kans om een van ons land se blinkste sterre te word. Wie weet, dalk staan jou naam op daardie kontrak,” sê Demi Lee Moore, wat in 2018 as die wenner van die kompetisie aangewys is.
Sy is amptelik op 23 November 2018 by die Afrikaans Is Groot-konsert in die Sun Arena in Pretoria aangekondig. Sy het ook op dié konsert opgetree as deel van haar prys.
Sy het intussen drie suksesvolle albums getiteld Mis eet slaap herhaal (2018), Country (2019) en Jy ken my naam (2021) uitgereik.
“Waag ʼn kans. Ek het en my wildste drome het waar geword.”
Besoek Die Kontrak se webwerf hier vir meer inligting oor die kompetisie.