Foto’s en video: Getroud met Rugby maak groot aankondiging

Zetske van Pletzen en Altus Theart. (Foto: Janie Monsieur/Maroela Media)

Getroud met Rugby het onlangs aangekondig dat die tydgleuf waarin dié sepie op die kassie te sien is, binnekort sal skuif.

Die akteurs en aktrises het ook saamgespan om ʼn Getroud met Rugby-liedjie saam te stel en sing self dié liedjie.

Getroud met Rugby het Dinsdagaand hul tiende verjaarsdag tydens ʼn spoggerige geleentheid by die Four Seasons Hotel Westcliff in Johannesburg gevier. ʼn Hele rits huidige en voormalige Getroud met Rugby-sterre het dié geleentheid bygewoon.

Altus Theart, wat die rol van Fafa Beltrami vertolk, het as seremoniemeester vir die aand opgetree en het met die gehoor gepraat oor Maandag 29 September 2008 toe die kameras vir die eerste keer op die stel van dié sepie begin rol het.

Hanna Grobler. (Foto: Janie Monsieur/Maroela Media)

Karen Meiring, die uitvoerende hoof van kykNET, het die aankondiging gemaak dat dié gewilde sepie nie meer om 21:00 te sien sal wees nie, maar eerder om 18:00.

“Dit is my verrassing vir die aand: Getroud met Rugby is ʼn wenner en daarom het ons die vrymoedigheid om die tydgleuf daarvan aan te pas. Getroud met Rugby sal van 1 Julie af om 18:00 op weeksdae op kykNET uitgesaai word,” het sy gesê.

“Die skuif is om spitskyktyd op kykNET af te skop. Ons is almal baie opgewonde hieroor en ons weet dit gaan die kykersyfers opstoot na verdere hoogtes toe.”

Die sterre van Getroud met Rugby het nóg ʼn verrassing vir die gehoor gehad toe hulle spontaan ʼn nuwe liedjie vir dié sepie begin sing het.

Theart (Fafa), Johan Scholtz (Schalk), Marlee van der Merwe (Kristien), Kate Roothman (Anna), Stephanie Baartman (Bibi), en David Johnson (Liam) het almal hul plek agter die mikrofoon ingeneem om “Die final” te sing. Die lirieke van die lied is deur Deon Opperman en Sean Else geskryf terwyl die musiek deur Janine Neethling gekomponeer is. ʼn Musiekvideo van dié liedjie sal binnekort beskikbaar wees.

Deon Opperman. (Foto: Janie Monsieur/Maroela Media)

Deon Opperman, die skrywer van die sepie, het gesê dat hy tien jaar gelede saam met sy vorige vrou, Hanlie, aan die idee vir Getroud met Rugby gedink het.

“My lewe is diep deur die program geraak. Maar dit is vir my verstommend hoeveel die program ander mense ook geraak het. Ons het nooit gedink dit gaan meer as die eerste seisoen se 26 ure se lugtyd kry nie, maar toe word ons net weer hernu, en weer en wéér,” het Opperman gesê.

Oor Getroud met Rugby se inhoud het Opperman gesê hy hou daarvan om riskant te wees daarmee, en dat Afrikaners eintlik baie meer waaghalsig is as wat mense dink.

ʼn Paar leidrade van wat in die volgende seisoen van dié sepie sal gebeur, is ook by dié geleentheid in ’n voorskou verklap.

Die feeks van die program, Kristien Smit, gespeel deur Marlee van der Merwe, het nog ’n paar geraamtes in die kas. Haar sondes begin haar stadig maar seker inhaal.

Reitz Bekker wil ’n nuwe koers inslaan. “Ek dink ek gaan ophou met rugby,” sê hy in die voorskou.

Johan Scholtz. (Foto: Janie Monsieur/Maroela Media)

Die afrigter van die Stryders, Schalk, is ook in ’n nuwe fase van sy lewe. Hy is op soek na ’n nuwe liefde.

Kykers kan ook ’n troue/verlowing in die nabye toekoms verwag wat beskou word as die “troue van die jaar”. Die inligting wat hier verklap kan word, is dat dit een van die Stryders is wat op trou staan.

Dit wil ook voorkom of ʼn moord onder die Stryders-gemeenskap gaan plaasvind. In ʼn skoot van Schalk sê hy: “Die polisie is op die perseel, hier was ’n insident op ons perseel”. In ʼn ander skoot sê iemand ook “Jy gaan nie rus totdat jy betaal vir wat jy gedoen het nie” en “Jy gaan nie hiermee wegkom nie”.