Rasgeweld in sepie skok

Sechaba Moloi-Matabane vertolk deur Motlatse Mafatshe (Foto: Facebook)

Aanhangers van die gewilde SABC 3-sepie Isidingo is hewig ontsteld nadat dié sepie die afgelope week ʼn episode uitgesaai het waarin twee wit Afrikaanse mans ʼn swart man aanval en lewend begrawe.

In ʼn episode wat verlede Woensdag uitgesaai is, het dié twee mans die karakter Sechaba Moloi-Matabane ʼn “bobbejaan” genoem nadat hy hul eiendom betree het.

Sechaba (gespeel deur Motlatse Mafatshe) se karakter besoek sy pa se graf voor hy deur die wit mans op hul eiendom betrap word.

Hulle noem hom dan ʼn “bobbejaan”, slaan hom en begrawe hom lewend.

Meer as 1 000 aanhangers het hul stem by dié debat oor rassisme op Facebook gevoeg. Aanhangers se reaksie oor die kwessie was gemeng, met sommige wat die sepie prys omdat hy nie wegskram van “regte kwessies” nie, en ander wat die skrywers en vervaardigers veroordeel vir dié besluit.

Volgens Sumaya Petersen Mogola, woordvoerder van die sepie, was dit egter vir die skrywers belangrik om “belangrike kwessies waarmee ons daagliks in Suid-Afrika te doen het” aan te pak.

“Dit is iets waaroor ons moet praat, omdat ons rassisme elke dag in die gesig staar,” verduidelik Petersen Mogola. “Dit maak nie saak of jy wit of swart is nie, almal word steeds deur rassisme geraak en dit help nie ons skram weg van die kwessie nie.

Die mans wat Sechaba Moloi-Matabane aangeval en begrawe het (Foto: Facebook)

“In die verlede kon ons al suksesvol daarin slaag om ander kwessies te takel soos verkragting en geweld, maar dit was dié keer belangrik om rassisme ook te bespreek – en dan ook om ʼn storielyn te skryf soortgelyk aan ʼn voorval wat al in Suid-Afrika plaasgevind het.”

Petersen Mogola verwys na Willem Oosthuizen (28) en Theo Martins Jackson (29), wat daarvan beskuldig word dat hulle ʼn man in ʼn doodskis gedruk en hom lewend wou begrawe. Die twee mans is aanvanklik van ontvoering en aanranding met die doel om ernstig te beseer aangekla en sal van 26 tot 29 Junie verhoor word.

Dié fiktiewe storielyn sal later op ʼn meer gematigde wyse hervat word. “Die karakter Matlala moet besluit of hy wraak wil neem op die mense wat Sechaba seergemaak het. Niks soortgelyks gaan gebeur nie, maar die kwessie gaan verder bespreek word.”

Petersen Mogola sê die vervaardigers en skrywers is tot dusver gelukkig oor die “gemengde reaksie” wat hulle ontvang het ná die episode uitgesaai is.

Sy kon nie bevestig of sommige kykers Isidingo by die Uitsaaiklagtekommissie (UKKSA) verkla het nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

45 Kommentare

jongste oudste gewildste
Onbekend

Ek hoop Isidingo wys ook n paar plaasmoorde sodat die ander kant van die lewe wat soveel meer is gesien kan word!!

Dis pateties

Die punt is hy is nie geslaan en lewend begrawe nie so julle soek nou vir nonsens! Wat van as Binnelanders elke aand wys hoe swartes wit boere martel en vermoor, want hoekom moet ons van die realiteit wegskram??. Terwyl julle nou so op realiteite wil konsentreer, wys asb die swart op wit aanvalle dan ook in julle sepies!! Sommer ook die wit dokter wat die naweek deur swartes deur altwee sy bene geskiet is .. Pateties!!

Dirk

Dit bou nie nasie nie

Haan

Aspris gedoen!

m

Ag rerig sulke snert raak nou afgesaag.