Met Maroela Media en kykNET se sepiegids kan jy nou weekliks ʼn voorsmakie kry van die gebeure in jou gunstelingsepie.
Binnelanders
Weekdae om 19:30 op kykNET
Maandag 15 November
Die gebeure by Trudie se skool het die hoofopskrifte gehaal, en Steve trap Tracy en Conrad uit oor Tracy by Ruan se skool was. Louis probeer ʼn ernstige gesprek met Renate aanknoop. Danny se ernstige gesprek met Chanel lei daartoe dat sy op die oorlogspad beland.
Dinsdag 16 November
Chanel moet haar gewete – en haar hart – skoonmaak deur met Martin te praat oor wat sy gedoen het, terwyl Jenna en Danny hul sorge verdrink. Trudie en Renate het ʼn baie eerlike gesprek oor Trudie se aksies, en Tracy besluit om die bul by die horings te pak en ʼn gesprek met Steve te hê oor die geldinsameling.
Woensdag 17 November
Tertius kry meer as een verrassing, terwyl Louis ook verras word met ʼn krisis in Tonik. Hugo en Julia bespreek Steve se versoek, terwyl uitgawes Conrad se bloeddruk laat styg. Idees en realistiese doelwitte word deur die raad bespreek, terwyl die kinders se voogskap ʼn hoofpyn word vir iemand. Trudie se woorde spook by Naomi.
Donderdag 18 November
Daar is nog ʼn krisis by Tonik, terwyl Tertius en Annelize se verhouding groeipyne beleef. Tracy saai weer onsekerheid by Conrad, en Naomi maak ʼn besluit bekend aan Louis. Die geldinsamelingsprojek skop af, en ʼn ongewoon intieme oomblik gaan nie ongesiens verby nie.
Vrydag 19 November
Naomi deel wysheid met ʼn steeds onrustige Tracy, terwyl Delia belangrike sake-inligting by Brandon probeer kry. Gaby probeer Tertius help met ʼn bietjie vroulike raad, en Conrad probeer Hugo tot ander insigte bring. Wimpie het baie te sê oor Rodney se gebaar, terwyl Ruan die waarheid probeer verwerk.
Suidooster
Weekdae om 18:30 op kykNET en kykNET&kie.
15 November
Susan en Elana is op soek na ’n geskikte skenker, maar dis moeiliker as wat hulle gedink het. Bridgette hoor iets wat haar ontstel, en Nazeem doen die ondenkbare.
16 November
Skoknuus oor Nazeem versprei soos ’n veldbrand. Donovan verstaan nie hoekom Bridgette skielik afgetrokke is nie en Justin vra verskoning vir sy onsensitiewe opmerking.
17 November
Justin is oortuig dat daar ’n oomblik tussen hom en Susan was en wil iets aan die saak doen. Nazeem konfronteer vir AB oor hoe hy Mymoena behandel, terwyl Bridgette en Donovan dinge uitpraat.
18 November
AB heroorweeg sy houding teenoor Nazeem, terwyl Susan worstel met haar gevoelens vir Justin. Zoe en Tim gesels met ʼn familielid van Donovan.
19 November
Bridgette en Lee-Ann sny Nazeem af. Greg probeer smokkel met Bridgette se kop, terwyl Mymoena uitvind dat Nazeem meer geweet het as wat hy wil erken.
Getroud met rugby
Weekdae om 18:00 op kykNET
Maandag 15 November
Bibi en Jordan deel opwindende nuus. Simon baklei hard vir sy kind. Henk en Kristien het meer gemeen as wat hulle verwag het.
Dinsdag 16 November
Simon ontvang die uitslae van Renate se sielkundige evaluasie. Charlie kom kuier vir Lulu. Buks ly aan ’n slaapversteuring.
Woensdag 17 November
Die gemoedere in die Greeff-huishouding loop hoog. SinBin lek sensitiewe inligting oor die Stryders uit. Ronnie ontvang ’n onwelkome besoeker.
Donderdag 18 November
Nesie kry haar bokshandskoene gereed vir Buks se nagmerries. Kristien ontdek wie die Stryders se inligting uitgelek het. Virginia probeer tot Renate deurdring.
Vrydag 19 November
Jordan en Bibi se huwelikspartytjie breek aan. Amanda wys vir Schalk wie is baas. Ivy is benoud oor Rooies.
Arendsvlei
Maandag tot Donderdag om 19:30 op kykNET&kie
Maandag 15 November
Lennie en Ingrid se verhouding raak al hoe inniger en dit gee haar ook meer geleenthede om hom te manipuleer. Ayesha vertel vir Janice dat sy verlief is op iemand.
Dinsdag 16 NOVEMBER
Lionel kry bewyse dat Ayesha verlief is op hom. Fred is bekommerd wanneer Elsa iets met hom deel. Dis tyd vir die eerste Fresh Blood Event en soos gewoonlik het Ingrid ’n paar verrassings.
Woensdag 17 November
Lennie is briesend as die eerste boksgeveg in Bompie se jaart in ’n bloedbad ontaard. Langes moet moeilike keuses maak in die soektog na sy suster. Karelse probeer om vir Ingrid en Lennie te intimideer. Aisha is in ’n toestand oor Langes en gaan soek hulp by Zuleika.
Donderdag 18 November
Lennie hou nie daarvan dat Jo terug is nie. Langes soek gefrustreerd na Mario en Ayesha het baie om te verduidelik.