Met Maroela Media en kykNET se sepiegids kan jy nou weekliks ʼn voorsmakie kry van die gebeure in jou gunstelingsepie.
Skermgreep uit vandeesweek se ‘Arendsvlei’.
Binnelanders
Weeksdae om 19:30 op kykNET
Maandag 4 April
Piet probeer vasstel of Gaby enige nuttige inligting het, en Jazzy kry ʼn nare verrassing ná haar besoek aan Annelize. Tracy se plan tree in werking.
Dinsdag 5 April
Rian doen ʼn skokkende ontdekking – en word deel van ʼn meesterplan. Delia rig ʼn waarskuwing aan Louis, en Chanel wil weet wat Danny en Martin se verbintenis is.
Woensdag 6 April
Conrad en Tracy kom tot ʼn nuwe vergelyking oor Tonik. ʼn Bakleiery ruk handuit, en kommunikasie is die rede vir groot blydskap – en ʼn waarskuwing!
Donderdag 7 April
Conrad verwelkom ʼn nuwe klomp dokters wat aan ʼn internskap-program deelneem. ʼn Skoonheidsveldtog trek aandag, terwyl ʼn dokter se loopbaan in die weegskaal hang.
Vrydag 8 April
Uys is nie heeltemal seker wat om van Zanel te maak nie. At raak gefrustreerd met Piet, terwyl Naomi op nog ʼn eienaardige toneel afkom. Rian doen ʼn ontdekking wat ʼn teorie kan staaf.
Suidooster
Weeksdae om 18:30 op kykNET en kykNET&kie
Maandag 4 April
AB en Mymoena wroeg daaroor of hulle die volle waarheid moet vertel, maar dan is daar verdere verwikkelinge met die penarie waarin hulle verkeer.
Dinsdag 5 April
AB word in ʼn onmoontlike posisie geplaas, terwyl Ty met Carlo se vriendskappe inmeng. Simon probeer sy agteruitgang wegsteek.
Woensdag 6 April
Dirk wil vir die Samsodiens ʼn bewys stuur om hulle berusting te gee, maar kry nie die nodige samewerking nie. Simon se toestand vererger.
Donderdag 7 April
Mymoena neem ʼn desperate besluit, terwyl Dirk en sy ma stry kry. Danni twyfel opnuut oor haar pa se gesondheid, en Lee-Ann ontdek iets wat Ty ontstel.
Vrydag 8 April
Mrs J is bekommerd oor Simon wat voorgee dat hy goed regkom, terwyl Ty vassit met Carlo en sy vriende. Mymoena is desperaat om hul nagmerrie te beëindig.
Getroud met rugby
Weeksdae om 18:00 op kykNET
Maandag 4 April
Festus is bekommerd oor Koekie se gesondheid. Nesie se loopbaan staan voor ʼn kruispad. Die Pompoms is nuuskierig oor Ryno en Anastasia se vriendskap.
Dinsdag 5 April
Almal is bly Pottie’s behoort weer aan Pottie en Magda. Die vroue kry die uitslae van hul oudisies. Dinge raak ongemaklik tussen Anastasia en Ryno.
Woensdag 6 April
Dis die vroue se eerste oefening vir die konsert. Koekie ondergaan ʼn operasie. Jordan help vir Amanda met haar besering.
Donderdag 7 April
Jana onttrek uit die konsert. Ryno probeer sin maak van wat tussen hom en Anastasia gebeur. Koekie is terug by die huis.
Vrydag 8 April
Buks sukkel om by te hou met Nesie se buie. Charlie kom kuier by Simon en Lulu. Festus het ʼn verrassing vir Koekie.
Arendsvlei
Maandag tot Donderdag om 19:30 op kykNET&kie
Maandag 4 April
Eva vertel vir Lennie oor haar verlede en mishandeling deur Mario. Ingrid en Angel kuier saam met Priester en Ronnie op die Greyling-landgoed. Ronel is geïnteresseerd in Thys.
Dinsdag 5 April
Ingrid por die misverstande tussen Angel en Daniel aan op haar slinkse manier. Arme Ronel probeer haar pad terugvind na Thys, maar hy is op sy eie missie.
Woensdag 6 April
Angel sukkel om te verstaan wat tussen haar en Priester aan die gang is. Eva neem ʼn groot besluit oor haar nuwe lewe, terwyl Ruby probeer herstel ná haar val.
Donderdag 7 April
Ruby deel die trauma van haar verlede met Daniel en dit laat hom nadink oor Dorothy en Angel. Thys ontmoet sy muse en kan nie ophou om aan haar te dink nie.
