Alexa Sexton. Foto: Facebook
Die Bristol Herald Courier berig Alexa Sexton het op 25 April haar mondigwording gevier deur in haar tuisdorp, Bristol, iets vir ander te doen. Volgens Sexton het sy as ʼn bedorwe brokkie grootgeword, maar haar uitkyk op die lewe het sowat ʼn jaar gelede ingrypend verander. “Ek het my laat groot doop en my hele ingesteldheid het verander,” het sy gesê.
Sexton het haar verjaardag afgeskop deur vir haar ma ʼn geskenk te gee. Sy en ’n paar vriende het die res van die dag welwillend teenoor ander opgetree. Hulle het onder meer kos gevat vir mense in die wagkamer by ʼn plaaslike hospitaal, saam met pasiënte gebid en ontbyt gevat vir brandbestryders by die brandweerstasie.
“Ek het my lewe vir God gegee en Hy het my hart verander. Ek glo dat ek op die aarde geplaas is met ’n doel en ’n groot deel daarvan is om mense te inspireer om goedgesind teenoor ander te wees,” het Sexton gesê.
Nou dis nou sommer ‘n bak idee! Dink nou as elkeen net IETS doen soos die, hoe dit die wêreld sal verander. Ek kan self ook sê NIKS laat mens lekkerder voel as om te gee nie – hoe klein ookal dit is wat jy gee.