Net soos wat babas geleer word om die potjie te gebruik, kan beeste ook geleer word om ʼn spesiale hokkie te gebruik om sodoende kweekhuisgas-uitlating te verminder.
In ʼn studie, wat in Duitsland gedoen is, het wetenskaplikes die diere opgelei om ʼn toegewyde hokkie te gebruik. Hul urine is daarna versamel en behandel.
Die ammonia van die beeste se urine verander in ʼn kweekhuisgas-stikstofoksied wanneer die met grond in aanraking kom.
Navorsers het gepoog om 16 beeste te leer hoe om ʼn toilet, genaamd die “MooLoo”, te gebruik op ʼn plaas wat aan die Navorsingsinstituut vir Plaasdierbiologie behoort.
Die diere is in die MooLoo-hokkie geplaas en is beloon met kos wanneer hulle geürineer het. Hulle is daarna in ʼn gebied langs die MooLoo geplaas en ook beloon wanneer hulle in die hokkie gaan urineer het.
Jan Langbein, mede-outeur en dieresielkundige aan die navorsingsinstituut, sê daar is ʼn algemene opvatting dat beeste nie in staat is om urinering of ontlasting te beheer nie. “Beeste, net soos baie ander diere of plaasdiere, is egter baie slim en hulle kan baie leer.”
Langbein hoop dat “alle beeste oor ʼn paar jaar ʼn toilet sal gebruik”. Die bevindings is in die joernaal Current Biology gepubliseer.
Lees meer: USNews, Farming Independent, The Guardian
Lyk vir my beeste leer makliker as party mense.