Dié tannie spog met ʼn mond vol tande

Kalpana Balan (Foto: Guinness-wêreldrekords)

ʼn 26-jarige vrou van Indië met 38 tande het ʼn Guinness-wêreldrekord ontvang.

Kalpana Balan het nou die rekord vir die meeste tande in ʼn vrou se mond. Volwassenes het gewoonlik 32 permanente tande.

Volgens Guinness-wêreldrekords, het die ma van een vier ekstra tande in haar onderkaak en twee ekstra tande in haar bokaak.

As tiener het Kalpana die ekstra tande geleidelik een-vir-een bygekry. Sy het nie enige pyn ondervind nie, maar het soms gesukkel om te eet wanneer kos tussen die ekstra tande vasgesit het.

Toe haar ouers die bykomende tande opgemerk het, was hulle baie verbaas en het aanbeveel dat sy ʼn operasie ondergaan om die tande te trek. Kalpana se tandarts het egter aanbeveel dat sy wag totdat die tande uitgroei, omdat dit dan makliker getrek sou kon word, het GWR in ʼn verklaring gesê. Sy het besluit om die tande te hou totdat dit uiteindelik volledig uitgegroei het, aangesien sy bang was om met die prosedure voort te gaan.

Kalpana Balan se mond vol tande (Foto: Guinness-wêreldrekords)

“Ek is baie bly om die Guinness-wêreldrekord te ontvang. Dit is ʼn prestasie van ʼn leeftyd,” het sy oor haar nuwe titel gesê.

Kalpana se manlike eweknie is Evano Mellone van Kanada – hy het 41 tande.

Volgens Guinness-wêreldrekords is die mediese term vir dié toestand hiperodonsie. Tot 3,8% van die wêreld se bevolking het een of meer bykomende tande. Hiperodonsie is die gevolg van ʼn wanfunksionering in die tandformasieproses, alhoewel die presiese oorsaak onbekend is.