Grootste twiet ooit onttroon – deur hoenderhappies

Carter Wilkerson (Foto: Twitter)

ʼn Tiener van die Amerikaanse deelstaat Nevada het die sosiale netwerk Twitter se voorheen gewildste twiet óóit, wat meer as 3,4 miljoen keer hertwiet is, onttroon met ʼn twiet oor hoenderhappies.

Die Amerikaanse kletsprogram-aanbieder en komediant Ellen DeGeneres het in 2015 geskiedenis gemaak toe ʼn foto van haar saam met ʼn klomp bekendes by die Oscar-toekennings nagenoeg 3,4 miljoen keer hertwiet is.

Die komediant het dié rekord langer as ʼn jaar gehou, maar Carter Wilkerson van Nevada, wat ʼn voorliefde vir hoenderhappies het, het haar vandeesweek amptelik onttroon.

Wilkerson het hom op 6 April tot dié platform gewend om aan die kitskosgroep Wendy’s te vra hoeveel keer sy inskrywing hertwiet sal moet word vir ʼn jaar se voorraad van dié happies.

Nadat die groep met “18 miljoen” geantwoord het, het hy in ʼn boodskap aan Twitter-gebruikers gevra om dié droom waar te maak. “Help me please,” lui sy inskrywing. “A man needs his nuggs.” [sic]

Dié inskrywing is teen 10 Mei meer as 3,5 miljoen keer hertwiet – amper 100 000 keer meer as DeGeneres se foto.

Groot maatskappye soos Microsoft en Amazon het hom ook in sy poging gehelp.

Hoewel die twiet nog nie 18 miljoen gehaal het nie, het Wendy’s intussen gesê 3,5 miljoen is meer as genoeg om vir hom ʼn jaar se voorraad van sy gunsteling-hoenderhappies te gee.

Wilkerson se Twiet (Foto: Twitter)

Ellen DeGeneres se Twiet (Foto: Twitter)

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

Een kommentaar

Valerie ·

Die absolute banaliteit en absurditeit van sogenaamde “sosiale media.” In vergelyking is kinderagtighied volwasse.

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.