Kevin Fast geniet twee dinge baie: om soos Kersvader aan te trek en om wêreldrekords op te stel.
Fast het einde verlede maand sy 32ste Guinness-wêreldrekord opgestel vir die sleep van die swaarste slee. Die vragmotor met ʼn slee, plastiek takbokke en Kersgeskenke agterop het 16 500 kg geweeg.
Dié pastoor van Kanada se vrou en twee seuns het hom in sy rekordpoging ondersteun en was soos Kersvader se vrou en elwe aangetrek.
Fast is reeds die afgelope 22 jaar besig om nuwe wêreldrekords op te stel. Hy is onder meer die wêreldrekordhouer vir die sleep van die swaarste vliegtuig (188,83 ton), die meeste mense op sy skouers (11) en sleep van die swaarste huis (35,9 ton).
Sy oefenroetine behels onder meer gewigte optel en rotse en stompe gooi.
Op die vraag oor waarom hy besluit het om hierdie uitdaging aan te pak, antwoord Fast: “Ek wil iets lekker doen en miskien kan ander mense geniet waarmee ek besig is.”