Koedoebul doen ‘inkopies’ in Namibië

Die koedoebul het reguit op die groenterak afgepeil (Foto: Die Republikein)

Die koedoebul het reguit op die groenterak afgepeil (Foto: Die Republikein)

ʼn Koedoebul het vandeesweek mense se monde laat oophang toe hy doodluiters “inkopies” by ʼn winkel in Karibib in Namibië gedoen het.

Die Republikein het berig dié winkel, waarvan die naam nie bekend is nie, behoort aan Bernard en Engela Pieters.

Pieters het aan dié koerant gesê die voorval het skuins ná 08:00 Sondagoggend gebeur.

Hy was aanvanklik onseker oor ʼn gedruis in die winkel wat hy uit sy kantoor kon hoor, maar het kort daarna op die koedoebul afgekom.

Pieters het gesê die bul was veral geïnteresseerd in die groenterak en spesifiek die piesangs.

Die koedoebul (Foto: Die Republikein)

Die koedoebul (Foto: Die Republikein)

Hy het egter gesukkel om enigiets gehap te kry omdat sy pote konstant op die teëlvloer gegly het.

Die winkelpersoneel kon die koedoe uit die winkel jaag.

Pieters het ook vertel dié koedoebul se nuuskierigheid is heel waarskynlik die gevolg van die voortslepende droogte in Namibië.

Die koedoebul kon egter nie te dors gewees het nie, want hy is blitsig verby die drankwinkel.

Bron: Die Republikein

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

9 Kommentare

jongste oudste gewildste
johann cb

Hoe lekker lag ek vir die bulletjie wat nee sê vir sy knertsie!

Theresa B

Ag siestog. Ek hoop hulle het vir hom iets gegee om te eet. Maar klink of hulle hom net verwilder het. Ek sou iets gegee het om te eet. As jy honger is, is jy honger.

Incogniteo

Ek hoop hy het darem betaal.

Jeanne

opphang, net ‘n klein tikfoutjie

Jakes

Pasop vir dolsiekte… ek sê maar net.
Ek het die tipe ding al in die droogte gesien op ons plaas in Namibië.