Kyk: Spinnerak-kombers in Australië ná oorstromings

Foto: u/jk409 op Reddit/Australia

Dae ná ʼn groot storm die suidooste van Australië getref en oorstromings veroorsaak het, sukkel inwoners steeds met kragonderbrekings en geboue wat beskadig is.

Toe die vloedwater egter begin terugtrek, het inwoners van East Gippsland in Victoria egter besef hulle is omring deur groot spinnerakke wat langs paaie, teen pale, padtekens, bome, plante en enigiets anders wat hoog of lank is, gespin is.

Die spinnerakke is só groot dat dit soos deursigtige nette lyk wat die grasvlakte bedek.

Die spinnekoppe het glo dié ingewikkelde spinnerakke gespin om van laagliggende dele af weg te kom en die vloedwater te vermy wat hul huise sou verwoes.

Volgens ʼn BBC-berig het kenners gesê die “gaasagtige sluiers” word veroorsaak deur ʼn oorlewingstaktiek wat as “ballonering” bekend staan, waar spinnekoppe sy versprei om hoër te kan opklim.

The Guardian berig die byt van die betrokke spinnekop is nie gevaarlik vir mense nie, maar dit kan geringe irritasie veroorsaak. Die kenner het gesê mense hoef nie bekommerd te wees nie, omdat die giftande van die spinnekoppe “waarskynlik te kort is om ʼn mens se vel binne te dring”.

Raadslid Carolyn Crossley, ʼn raadslid van Wellington Shire, is ʼn voëlkyker en sy het in die distrik rondgery, berig ABC News. Sy het gesê “baie besige spinnekoppe” wat van die vloedwater wou vlug het die spinnerakke geskep. Sy het ʼn video op haar Facebook-blad gedeel. “Ek kon myself nie help as om hierdie gaasagtige web wat in die wind wapper te deel nie,” het sy gesê en inwoners versoek om die vloedverligtingsfonds te ondersteun.