Man se fooitjie-idee het meeste warm onder die kraag

Die foto wat op Facebook gedeel is

ʼn Facebook-gebruiker wat sy idee vir ʼn fooitjie in ʼn restaurant op dié sosialemediawebwerf gedeel het, het meeste persone (veral enigiemand wat al ʼn kelner was) warm onder die kraag.

Die man het een aand, toe hy en sy vrou gaan uiteet het, sy plan uitgevoer en die uitslag op Facebook gedeel. Volgens hom is dit ʼn manier om “die beste diens ooit” te kry.

Hy het verduidelik dat hy, aan die begin van die ete, vyf $1-note op die tafel neergesit het vir die kelner om te sien. “Moenie enigiets vir hulle sê nie,” skryf hy. “As hulle ʼn fout maak, dan vat jy een van die note weg en so aan. Teen die einde van die ete – wat ook al oor is, is die fooitjie.”

Volgens hom kon hy sien sy kelnerin wonder oor die geld. Hy het ʼn noot weggevat toe sy vergeet het om broodjies na die tafel te bring, maar dit teruggesit toe sy ekstra broodjies gebring het. “Haha dit was toe ʼn lekker aandjie uit met my geliefde en ʼn goeie eksperiment. Probeer dit – jy sal verbaas wees!”

ʼn Skermskoot van die man se plasing is deur ʼn omroeper in Atlanta, Mark Arum, op Twitter gedeel met die boodskap: “As ʼn voormalige kelner, moet dit asseblief nooit doen nie. Nooit.”

Talle persone het met skok en verbasing op Arum se plasing reageer met verskeie persone wat nie kon glo dat ʼn klant boonop ook slegs $5 as ʼn fooitjie wou aanbied vir ʼn ete van twee persone nie. Talle het ook hul verbasing uitgespreek dat die persoon “so openlik onbeskof” kon wees.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

132 Kommentare

jongste oudste gewildste
wilma

‘n Vriendin het ‘n tydjie gelede ‘n ooievaarspartytjie met ‘n buffet-ete in ‘n restourant gereël. Na afloop van die ete het sy ‘n 10 % fooi gegee net om daarna op die rekening te sien dat daar reeds ‘n fooi van 15% ingesluit was by die finale rekening. ‘n Mens moet maar jou rekening nagaan voor betaling aangesien daar nog ander restourante is wat ‘n fooi by jou totale rekening insluit.

koos1

Ek hou van die idee, maar ek sal onderskeid tref tussen foute van die kelner en die persone wat die kos maak en die wat jou drankies gooi. Hulle foute mag nie die kelner benadeel nie! Verder sal die fooitjie grooter as die $5 moet wees.
Kelners moet ook besef dat daar ‘n verantwoordelikheid op hulle rus om ‘n fooitjie te verdien, en nie net te kry nie, dit is immers ook ‘n werk.

christa

ek gee geen fooi nie. Nie vir motorwagte of kelner nie. Ek gaan uit en begroot vir die ete. Ek verwag van die restaurant om my te bedien as dit nie ‘n selfhelp diens is nie. otorwagte hoef nie my voertuig op te pas nie. Ek het alarms en anti hijack en en sluit ook nog my motor. Ek los my motor nooit langer as 30 minute alleen nie of vra dan spesifiek iemand om dit op te pas. As ek oral moet fooitjies uitdeel, waar gaan dit my testaan kom?

Ruby

Nee ek stem nie saam hiermee nie, ek gaan eet uit om tyd saam met ‘n geliefde te spandeer, nie om woer woer met die kelnerin te speel nie.

Restaurant eienaars maak genoeg geld veral met hulle drank pryse of self die werkers se salarisse te betaal.

Hoekom moet ek dit doen, so as ek PnP toe gaan of waar ookal moet ek hulle 10% ekstra gee?

Die werkers behoort ‘n vasgestelde salaris te kry soos in enige bedryf.

Tilda

Ek gee soos ek kan, dit is lekker om te gee en iemand se dag beter te maak. Dit kan nie altyd lekker wees om so lank op jou voete te wees en ander te bedien nie. Ek gee graag, dis net ‘n plesier.