Tjoekie toe oor ʼn spelfout

Die vervalste sterftesertifikaat wat ingedien is (Foto: Nassau County District Attorney’s Office via AP)

ʼn Misdadiger van Long Island in die VSA wou met ʼn vervalste sterftesertifikaat tronkstraf vryspring, maar ʼn spelfout het die aap uit die mou gelaat.

Robert Berger (25) van Huntington in New York kan nou ʼn bykomende vier jaar tronkstraf opgelê word as hy skuldig bevind word aan bedrog. Dit is buiten die vorige vonnisse wat hy opgelê is oor die besit van ʼn gesteelde motor en poging om ʼn vragmotor te steel.

“Ek staan verstom om te sien watter moeite mense sal doen om aanspreeklikheid vry te spring,” het Madeline Singas, staatsaanklaer vir Nassay County, gesê.

Berger sou verlede jaar in Oktober gevonnis word op die diefstal-aanklagte. Hy het egter uit New York gevlug en wou sy vorige prokureur, die staatsaanklaer en die regter om die bos lei deur hulle te oorreed dat hy sy eie lewe geneem het. Hy het glo sy verloofde gevra om die vervalste sterftesertifikaat in te dien.

Berger se sterftesertifikaat het soos ʼn amptelike dokument gelyk wat deur die departement van gesondheid in New Jersey uitgereik is, maar daar was ʼn groot probleem: “Registry” is as “Regsitry” gespel, het staatsaanklaers gesê. Daar was ook teenstrydighede wat die lettergrootte en lettertipe betref.

Die departement het bevestig die sterftesertifikaat is vervals.

Berger het skuld ontken op aanklag dat hy ʼn vervalste dokument ingedien het.

Die regter het borgtog van $1 toegestaan, maar Berger bly in aanhouding weens die hangende sake teen hom.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

4 Kommentare

jongste oudste gewildste
Rachel

Slim vang sy baas

Johan

Hy het skuld ontken dat hy ‘n vervalste dokument ingedien het. Sê hy dus dat die sertifikaat eg is en dat hy wel dood is?

Frankie

As dit in Souf Africa was het ek die spelfout op n amptelike dokument geglo