[Video] SA pianiste verstom met 40 vingers op een klavier

Van links na regs is Pieter Grobler, Elna van der Merwe, Charl du Plessis en Albie van Schalkyk. Die video volg onderaan die berig.

Deur Phillip Bruwer

Vier bekroonde Suid-Afrikaanse pianiste laat die monde oophang in ʼn video wat opnuut op sosiale media die ronde doen waar hulle gesamentlik die klawers tokkel.

Charl Du Plessis, ʼn klassieke pianis wat dié merkwaardige verwerking saamgestel het uit die werke van die Franse komponis Albert Lavignac se galopmars, het Saterdag aan Maroela Media gesê hy was verbaas toe hy sien die video is so gewild.

“Die video is al in Februarie geneem toe ons nog geoefen het. Ek was nie eens bewus dit word geneem nie,” het hy gesê.

Hy het gesê hy is deur die Oude Libertas in Stellenbosch gevra om ʼn projek aan te pak om dié nostalgiese teater se 40ste verjaardag te vier, asook hul peperduur Steinway-vleuelklavier se 40ste jaar in te wei.

“Ek het gedink aan ʼn konsep waar ons vier klassieke pianiste kan kry wat 40 vingers verteenwoordig om die 40ste mylpale te beklemtoon. En dit is hoe ons produksie, 40 Fingers, ontstaan het.”

Du Plessis, ʼn Pretorianer, het die Kapenaars Albie van Schalkwyk, Elna van der Merwe en Pieter Grobler ingespan om saam met hom agter die klawers in te skuif; die eerste keer wat dié vier saam speel.

“Ons het eers die stuk op ons eie geoefen voor ons dit saam aangepak het. Dit het sowat ʼn week se oefening geneem om dinge reg te kry, maar dit het nogal heel vinnig saamgeval aangesien my kollegas almal baie ervare pianiste is,” het hy gesê.

In die video kan ʼn mens sien hoe die pianiste in die melodiese harwar beurte maak om die musiekblad te blaai. Du Plessis en Grobler maak selfs ook ʼn tydjie om ʼn “selfie” te neem.

“Die stuk is so verwerk dat ons almal ʼn tydjie op die klawers kry, terwyl ons pret het. Die grootste uitdaging was maar om spasie vir 40 vingers op die 88 vleuels te vind. Daar bly maar ʼn elmbooggeveg soos aan ʼn etenstafel,” het hy geskerts.

40 Fingers was onlangs by Aardklop in Potchefstroom op die planke en is 22 November terug by die Oude Kraal-teater op openbare aanvraag. Op 22 Desember kuier die pianiste by Fancourt in George en as alles volgens plan verloop, pak die vier volgende jaar ʼn landwye toer aan.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

6 Kommentare

Bravo!! ·

Pragtige musiek julle 4 het n wenner daar beet!!
Maak nog sulke mooi musiek!

Sarel Strydom ·

Beste 4 x 4 wanneer mens kan luister. Talentvol en dit wil gedoen wees. Die ouer mense se woorde ” doet so voort “

Houtoog ·

Pragtig. Eerder ‘n opskrif met ‘klaVIER’.
Kyk na ‘klasieke’ moet wees ‘klassieke’ (2e par.) en ‘elbooggeveg’ is eerder ‘elmbooggeveg’ (2e laaste par.)

Landi Slatter ·

Dagsê Houtoog,

Dankie vir jou kommentaar. Ons vra om verskoning vir die oorsig, die berig is reeds gewysig.

Groetnis
Landi nms Maroela Media

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.