Video: Skape vorm hartjie vir geliefde tannie

Skermgreep uit die video

Ben Jackson, ŉ boer van Australië, kon nie sy tannie se begrafnis bywoon nie, weens Covid-19-regulasies. Hy het egter ŉ baie spesiale boodskap gereël toe hy sy skape in die vorm van ŉ hartjie aangejaag het.

Hommeltuig-beeldmateriaal van die ooie is by tannie Deb se begrafnis in Brisbane, Queensland, vertoon.

Jackson is in afsondering op sy plaas in Guyra in New South Wales, sowat 430 km van Brisbane.

“Dit het ŉ paar keer gevat om dit reg te kry. Dit was so naby aan ŉ hartjie as wat ek dit kon kry,” het Jackson gesê. Hy het tydens die verwoestende droogte in Australië begin om die vee met die hand te voer. Hy het toe begin om met verskillende vorms te eksperimenteer om die eentonige spanning te probeer verlig.

Hy het ontdek dat as hy die name van sy gunsteling-musiekgroepe met die graan uitspel soos wat dit van die agterkant van die vragmotor afgelaai word, die trop rofweg vir ŉ paar minute lank dieselfde vorm sal aanneem.

“Dit het my beslis beter laat voel tydens die droogte,” het Jackson bygevoeg. “Hierdie hartjie vir my tannie – dit lyk of dit reg oor Australië ŉ effek gehad het,” het hy gesê oor die emosionele reaksie op sosiale media. “Miskien het ons almal net ŉ virtuele drukkie nodig.”