Drie verbrande liggame is Vrydag in ʼn uitgebrande motor op ʼn plaas buite Mbombela, Mpumalanga, gevind.
Volgens kol. Donald Mdhluli, polisiewoordvoerder, is twee liggame onderskeidelik aan die bestuurders- en passasierskant, asook een in die kattebak ontdek. Die liggame is onherkenbaar verbrand.
“Volgens inligting het ʼn plaaswerker omstreeks 14:00 opgemerk dat ʼn plaashek oopstaan. Volgens die werker was die hek Maandag gesluit,” sê Mdhluli.
“Met ondersoek het die werker ʼn Hyundai i10-motor opgemerk. Die motor was uitgebrand en hy het drie liggame in die motor gewaar.”
Die werker het die polisie na die toneel ontbied.
Die identiteit van die oorledenes is in hierdie stadium nog nie bekend nie. Die omstandighede en motief rakende die voorval word nog ondersoek.
Enigiemand met meer inligting oor die voorval kan Stop Misdaad by 08600 10111 bel.