Tyd is ryp vir nuwe bestuursmodel vir munisipaliteite – AfriForum

(Argieffoto: Steve Buissinne/pixabay)

Die departement van samewerkende regering en tradisionele sake (Cogta) se aankondiging dat slegs 5% van munisipaliteite in Suid-Afrika as stabiel bestempel kan word en meer as die helfte in ’n finansiële verknorsing is, beklemtoon volgens AfriForum ’n dringende behoefte aan ’n nuwe bestuursmodel vir munisipaliteite.

Volgens Johan Kruger, hoof van gemeenskapsontwikkeling by AfriForum, is Cogta se aankondiging nie nuus nie.

“Cogta se jongste aankondigings verras ons nie, maar ons besef wel dat dit nou meer as ooit tyd is vir buitengewone ingrypings in munisipaliteite en vir ’n nuwe bestuursmodel vir munisipaliteite. Dit sal verhoed dat munisipale dienslewering heeltemal in duie stort,” het Kruger gesê.

Volgens Kruger het AfriForum reeds omvattende voorstelle gemaak vir deelnemende bestuur binne ’n koöperatiewe model, wat in ooreenstemming is met bestaande munisipale wetgewing.

“Ons glo dat dit moontlik is vir rolspelers in gemeenskappe wat oor die nodige vaardighede, ervaring en positiewe ingesteldheid beskik om saam met munisipaliteite te werk om stabilisering in munisipaliteite te bewerkstellig. Ons het hierdie omvattende voorstelle by verskeie geleenthede reeds aan die regering gestuur, maar geen reaksie daarop ontvang nie.”

Die onlangse verslag van die organisasie Corruption Watch – wat bevind dat die meeste korrupsie in munisipaliteite in munisipale bestuurders se kantore en in verkrygingsafdelings plaasvind – beklemtoon die behoefte aan groter deursigtigheid en deelnemende bestuur in sekere sleutelgebiede in munisipaliteite.

“Rolspelers in gemeenskappe se deelnemende bestuur binne ’n koöperatiewe model is kritiek noodsaaklik om toe te sien dat korrupsie hokgeslaan en uitgeroei word. Gemeenskappe kan nie langer staan en toekyk hoe belastinggeld geplunder en geen dienste aan gemeenskappe gelewer word nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

14 Kommentare

jongste oudste gewildste
Heinrich

Al wat gaan help hier is om ontslae te raak van die ANC en EFF, hulle het bewys dat hulle nie in staat is om te regeer nie.

Nie Verbaas

In die hande van ANC sal geen model werk nie.

JohanR

Sal dit bedoel dat mense met breins sal aangestel word, en nie ANC kaders met droe mielie putte tussen linker en regter ore?

annie

Cogta het reeds ‘n skrikwekkende reddingsplan op skrif wat beslis gelees moet word.; ‘n hoofstuk uit die Kubaanse handleiding oor hoe om kop-eerste oor die afgrond te sloeg. Antie ex-Zuma het haar goue Parker-pen vir die okasie uit sy kassie gehaal. Dit is deurspek met kommunistiese drome en edele dade wat ‘n slaaplose nag daarna verseker.

Blomme

Dit moes al lankal gebeur het. Klomp onbevoegdes wat net in die regte politieke party is. Weet NIKS van bestuur en of die portefeuljes wat hul beklee.