Argieffoto (Foto: Neom/Unsplash)
“God is met hulle wat Hom gehoorsaam. Die planne teen die hulpeloses sal verydel word, want die Here sal sy volk beskerm.” (Psalm 14:5-6)
Skrifgedeelte
Psalm 14:5-6 (NLV)
Oordenking
God is by dié wat aan Hom gehoorsaam is. Kom ons staan by hierdie stelling – want dit is die waarheid – sonder om akademies te raak oor God wat ook eintlik by almal is en so aan. Ja, aanvaar net hierdie feit: God is by my.
Iemand wat gehoorsaam is, is nie een wat sonder foute is nie, maar een wat sy foute maar te goed ken en by God gaan redding soek daarvoor. Dit is een wat weet hoe afhanklik hy is, wat God sy toevlug maak. So een is – deur Christus – regverdig gemaak. As jy in ʼn stryd is, onthou wie aan jou kant is. God is! Laat dit jou sterk maak.
Gebed
Dankie, genadige God, dat U so onverdiend en onvoorwaardelik vír my is. Amen.
- Hierdie oordenking verskyn in Mini-Oordenkings: Hoop vir elke dag deur Jimi le Roux. Dit word goedgunstiglik deur die Christelike Uitgewersmaatskappy/CUM verskaf.
