(Foto: Esté Meyer Jansen/Maroela Media)
“Moet julle dus nie oor môre bekommer nie, want môre bring sy eie bekommernis. Elke dag bring genoeg moeilikheid van sy eie.” – Matteus 6:34
Vergewe as ek die volgende gedig deur Phil Keaggy in Engels aanhaal:
Said the robin to the sparrow
I would really like to know
Why these anxious human beings
Rush about and worry so
Said the sparrow to the robin
Friend, I think that it must be
That they have no Heavenly Father
Such as cares for you and me
Ons bederf die voëls elke oggend met ruim saadjies en vrugte waarvan hulle hou. Eintlik bederf hulle ons omdat ons dit terdeë geniet om te sien hoe hulle baljaar. Hulle het so bederf geraak dat hulle vroegoggend reeds op die telefoondraad vergader en wag.
Voëls is weglaatbaar onbelangrik. Eksotiese voëls mag waardevol wees, maar die rooi vinkies en mossies wat by ons aandoen is sommer doodgewoon. Tog sorg ons, elke dag, so getrou dat ons selfs in vakansietye reëlings probeer maak dat hulle kos kry.
Die Here sorg vir die voëls, sê die teks. Hulle is die toonbeeld van rustige geloofsvertroue. Hulle maak nie bymekaar nie, sien nie die dokter oor uitputtende bekommernis nie. Hulle staan nie voor die spieël en wonder wat om aan te trek nie. Die Vader sorg vir hulle.
Twee mossies is weglaatbaar goedkoop. Jy betaal skaars daarvoor, sê die teks. Tog sorg God vir hierdie geringe wesens, hoeveel te meer vir ons?
Dalk kan ons by die voëls iets leer van geloofsvertroue, van veel minder bekommer en besorg wees, van bely: “My hulp kom van die Here wat hemel en aarde gemaak het, wat getrou bly tot in ewigheid en nooit laat vaar die werke van sy hande nie”.
- ToekomsVenster is ʼn daaglikse boodskap om individuele gelowiges toe te rus met praktiese geloofsvaardighede. Kleingroep-begeleidings, DVD’s en funksionele preeksketse is beskikbaar by Drienie ([email protected]) of besoek www.toekomsvenster.co.za
