Kikker jou kosblik met dié smullekker dis op.
Lewer 4 porsies
Bestanddele
- bietjie olie
- 2 uie, fyngekap
- 5 ml fyngekapte knoffel
- 3 wortels, geskil en in dun repies gesny
- 4 murgpampoentjies, in dun repies gesny
- 1 x 250 g-pakkie sampioene, in skyfies gesny
- 1 rooi soetrissie, ontpit en in blokkies gesny
- 1 geel soetrissie, ontpit en in blokkies gesny
- sout en varsgemaalde swartpeper na smaak
- 8 sagte tortillas
- 20 ml basiliepesto
- 875 ml gerasperde Clover‑mozzarellakaas
Metode
- Voorverhit die oond tot 180 °C.
- Verhit ’n bietjie olie in ’n swaarboomkastrol en soteer die uie en knoffel tot die uie sag is.
- Voeg die wortels by en roerbraai vir 3 minute. Voeg die murgpampoentjies by en roerbraai nog ’n bietjie. Voeg die sampioene by en roerbraai vir ongeveer 3 minute. Voeg laastens die soetrissies by en soteer vir 5 minute. Geur na smaak met sout en peper.
- Plaas 4 tortillas op ’n bakplaat en smeer 5 ml basiliepesto oor elk van die tortillas. Strooi die helfte van die gerasperde kaas oor die tortillas.
- Verdeel die groente tussen die 4 tortillas. Strooi die oorblywende kaas bo-oor die groente en plaas die oorblywende tortillas bo-op.
- Plaas die quesadillas onder die oond se roosterelement en rooster tot goudbruin bo-op. Plaas ’n ander bakplaat bo-op en keer die quesadillas om. Plaas die quesadillas weer onder die roosterelement en rooster tot goudbruin.
- Sny die quesadillas in wiggies en bedien dadelik.
Bron: Ekonomiese gesinskos
Uitgewer: Lapa