Die B-sportnutssegment is tans propvol! Al die vervaardigers haas om hul B-segment‑sportnutsbuksie aan die wêreld bekend te stel. ʼn Mens kan stry dat Ford se EcoSport een van die eerste B-SNV’s was. Ons het nou al Citroën se C3 Aircross, Honda se WR-V, die Hyundai Venue, die Kia Sonet, Mazda se CX-3, Nissan se Magnite, Peugeot se 2008, Renault se Kiger, Suzuki se Vitara Brezza, Toyota se Urban Cruiser en Volkswagen se T-Cross.
Van hierdie buksies is bekostigbaarder as ander, van hulle luukser as ander – maar ek dink die Kia Sonet vind die perfekte goue middeweg in die segment. Die Sonet is nie te duur nie, sy ontwerp is oulik, sy enjin gretig, ratkas lekker en sy spesifikasievlak sterk. Wat meer wil ʼn mens hê?
Uit ʼn ontwerpoogpunt is die Sonet werklik ʼn oulike sportnuts. Sy proporsies lyk soos ʼn SNV, nie ʼn luikrug of kruismodel nie. Die binneruim bied vyf gemaklike sitplekke en ʼn goeie spesifikasievlak.
Onder die kap skuil ʼn atmosferiese 1.5‑viersilinderpetrolenjin wat 85 kW en 144 Nm bied. Dit klink nie enorm nie, maar die Sonet voel werklik sterk en blitsig. Te danke aan goeie harmonie tussen die enjin en ratkas, kan die Sonet 7 l/100 km haal om die gekombineerde siklus… indrukwekkend.
Die volgende voordeel van die Sonet is sy aangename ritgehalte. Die Sonet ry op 16”‑wiele met ʼn 60‑profiel. Dit maak sy rit lieflik sag en soepel – in die kol vir ʼn sportnuts. Padhouvermoë is heeltemal voldoende vir ʼn voertuig van dié soort.
Veiligheidsgewys bied die Sonet twee lugsakke, sluitweerremme met elektroniese remkragverspreiding en vastrapbeheer. Dit is lekker sterk vir ʼn voertuig wat minder as R300 000 kos.
Dit is maklik om die Sonet op te som. Die inligtingstelsel bied Android Auto en Apple CarPlay en daar is lugreëling, so ʼn mens kan altyd gemaklik voel. Dit is nie te duur nie, en Kia se waarborg is ongeëwenaard teen vyf jaar met onbeperkte kilometer. Die diensplan self is ook stewig met vier jaar/60 000 km. Ek’t nou lank en hard gedink, en daar is nie enkele rede waarom ʼn mens nie ʼn Kia Sonet sou oorweeg nie.
Die reeks lyk só:
Kia Sonet 1.5 LX | 85 kW/144 Nm | 7 l/100 km | R275 995 |
Kia Sonet 1.5 EX | 85 kW/144 Nm | 7 l/100 km | R295 995 |
Kia Sonet 1.5 LX outo | 85 kW/144 Nm | 7,2 l/100 km | R296 995 |
Kia Sonet 1.5 EX outo | 85 kW/144 Nm | 7,2 l/100 km | R316 995 |
Die reeks word gedek deur ʼn 5 jaar/onbeperkte km‑waarborg en 4 jaar/60 000 km‑diensplan.
Die kompetisie lyk só:
Suzuki Vitara Brezza 1.5 GLX | 77 kW/138 Nm | 6,2 l/100 km | twee lugsakke | 5 jaar/200 000 km‑waarborg 4 jaar/60 000 km‑diensplan | R289 900 |
Ford EcoSport 1.5 Ambiente | 91 kW/150 Nm | 6,4 l/100 km | ses lugsakke | 4 jaar/120 000 km‑waarborg 4 jaar/60 000 km‑diensplan | R303 900 |
Hyundai Venue 1.0T Fluid | 88 kW/172 Nm | 6,5 l/100 km | ses lugsakke | 5 jaar/150 000 km‑voertuigwaarborg 7 jaar/200 000 km‑dryfstelselwaarborg 3 jaar/45 000 km‑diensplan | R354 500 |
Volkswagen T-Cross 1.0TSI 70 kW Comfortline | 70 kW/175 Nm | 4,8 l/100 km | ses lugsakke | 3 jaar/120 000 km‑waarborg 3 jaar/45 000 km‑diensplan | R357 900 |
Tussen dié mededingers kan die Sonet en Brezza se waarde nie misgekyk word nie.