Die Nissan Navara. (Foto: Cornel van Heerden)
Die huidige Nissan Navara was ongelukkig vir Nissan Suid-Afrika nie ʼn reusesukses soos die eerste generasie Navara nie. Daar was na my mening twee probleme. Hy was duur, en daai sagte agtervere wat nie vrag kon laai nie het hom een tree té ver gesit vir meeste kopers.
Net meer as twee jaar gelede het Nissan aangekondig dat die volgende Navara hier in Suid-Afrika, by hul aanleg in Rosslyn, gebou gaan word. Dit was weens verskeie redes fantastiese nuus. Vier redes om presies te wees. Nissan kan nou die produk teen ʼn meer bekostigbare prys lewer, die produk opknap vir plaaslike doeleindes, werk skep én die uiteindelik die onveilige NP300 ter ruste lê.
Die Nissan Navara. (Foto: Cornel van Heerden)
Het Nissan alle foute uitgeskakel? Ja, almal behalwe een. Die stuurkolom waaroor ek al tot vervelens toe gekla het in die Navara en Mercedes X-klas is steeds só. ʼn Mens kan die stuurkolom nie hoog genoeg stel nie. Dit is ʼn jammerte.
Die sagte agtervering is heelwat stywer gemaak, maar op ʼn baie slim manier. Dit is nie net hard nie, as die bakkie leeg is, dan ry hy lieflik sag. Daar is so te sê geen geskud terug deur die onderstel as gevolg van klipharde bladvere en ʼn soliede dryfas agter nie. Die Navara maak steeds gebruik van ʼn soliede dryfas, maar eerder kronkelvere en ʼn multilink-stelsel.
Die ontwerp is effens opgeknap. Ek persoonlik het baie van die vorige konkawe enjinkap gehou – maar die nuwe Navara lyk indrukwekkend soos hy daar staan. Die kajuit is grootliks onveranderd. Twee reuseopknappings is die nuwe LED-ligte, en die klankdemping in die kajuit. Op die pad toer die Navara heerlik stil.
Onder die kap
Die Nissan Navara. (Foto: Cornel van Heerden)
Dié Navara maak weer gebruik van ʼn opgeknapte weergawe van die ou 2,5 viersilinderturbodiesel. Die enjin bied nou 140 kW en 450 Nm. Hoekom die skuif? Nissan gee een rede, maar ek dink dit is tweeledig. Die eerste rede is dat die 2,5 met ʼn enkelturbo op swakker diesel kan loop. Die 2,3 dubbelturbo was ʼn hoër EU-gradering, en vra nét die skoonste, beste diesel. Dit is nie altyd oral op die platteland beskikbaar nie. Die ander rede, dink ek, is dat die 2,5 met ʼn enkelturbo ʼn goedkoper enjin sal wees om te vervaardig. Nissan het geweet hulle gaan aggressief moet wees met die prys, so dit maak dié skuif ʼn wen-wen.
Die enjin kom steeds met ʼn sewespoed outo. Die ratkas se programmering is puik. Daar is so te sê geen turbotraagtheid nie en ratwisselings is seepglad. Een ding wat die Navara al van die 2,3 se tyd af doen, is dat hy van omwentelinge hou. In die nuwe Navara maak die klankdemping seker dat die toere nie pla nie, maar ek is nie mal oor ʼn bakkie wat so hard rev tot by 4 500 r/min nie.
Die Nissan Navara. (Foto: Verskaf)
Die hele reeks behalwe die intree-petrolmodel kan geremde 3,5 ton sleep, en 750 kg ongerem. Die dubbelkajuitmodelle kan almal 750 kg loonvrag dra. Ons het 600 kg op een model gelaai, en die agtervering sak effens, maar geensins soos die vorige model nie – puik.
Ek moet die Navara só opsom. Dit is voorwaar ʼn lekker produk. Die stuurwiel is die enigste ding wat pla. Die klankstelsel is fantasties – en die 4 x 4-weergawe met sy vering is lieflik gemaklik. Vir diegene wat nié ʼn Toyota of ʼn Ford wil hê nie het die Navara homself sopas bitter aantreklik gemaak, veral as ʼn mens sien dat hy goedkoper is al sy direkte mededingers, Isuzu ingesluit. Nóg ʼn rede om opgewonde te raak is die toevoeging van ʼn enkelkajuitmodel tot die reeks!
Die reeks lyk só:
| Nissan Navara 2.5 XE | 118 kW/ 233 Nm | R311 000 | |
| Nissan Navara 2.5DDTi XE | 120 kW/ 403 Nm | 7.2 ℓ/ 100 km | R350 000 |
| Nissan Navara 2.5DDTi SE | 120 kW/ 403 Nm | 7,2 ℓ/ 100 km | R426 000 |
| Nissan Navara 2.5DDTi LE | 140 kW/ 450 Nm | 7,4 ℓ/ 100 km | R456 000 |
| Nissan Navara 2.5DDTi SE dubbelkajuit | 120 kW/ 403 Nm | 7,2 ℓ/ 100 km | R474 000 |
| Nissan Navara 2.5DDTi SE 4×4 | 120 kW/ 403 Nm | 7,6 ℓ/ 100 km | R492 000 |
| Nissan Navara 2.5DDTi SE outo dubbelkajuit | 120 kW/ 403 Nm | 8,1 ℓ/ 100 km | R498 000 |
| Nissan Navara 2.5DDTi SE Plus dubbelkajuit | 120 kW/ 403 Nm | 7.2 ℓ/ 100 km | R505 000 |
| Nissan Navara 2.5DDTi LE 4×4 | 140 kW/ 450 Nm | 7,6 ℓ/ 100 km | R527 000 |
| Nissan Navara 2.5DDTi SE Plus outo dubbelkajuit | 140 kW/ 450 Nm | 8,1 ℓ/ 100 km | R528 000 |
| Nissan Navara 2.5DDTi SE 4×4 dubbelkajuit | 120 kW/ 403 Nm | 7,6 ℓ/ 100 km | R552 000 |
| Nissan Navara 2.5DDTi SE Plus 4×4 dubbelkajuit | 120 kW/ 403 Nm | 7,6 ℓ/ 100 km | R580 000 |
| Nissan Navara 2.5DDTi LE dubbelkajuit | 140 kW/ 450 Nm | 8,1 ℓ/ 100 km | R606 000 |
| Nissan Navara 2.5DDTi LE 4×4 dubbelkajuit | 140 kW/ 450 Nm | 7,6 ℓ/ 100 km | R660 000 |
| Nissan Navara 2.5DDTi LE 4×4 outo dubbelkajuit | 140 kW/ 450 Nm | 8,1 ℓ/ 100 km | R677 000 |
| Nissan Navara 2.5DDTi PRO-2X dubbelkajuit | 140 kW/ 450 Nm | 8,1 ℓ/ 100 km | R686 000 |
| Nissan Navara 2.5DDTi PRO-4X 4×4 | 140 kW/ 450 Nm | 8,1 ℓ/ 100 km | R740 000 |
Die reeks word gedek deur ʼn 6 jaar/ 150 000 km waarborg en 6 jaar/ 90 000 km diensplan.
Ons sal weer tyd met die Navara deurbring en hom dán in diepte teen sy mededingers vergelyk. Hier is wel ‘n vergelyking van die intree-dubbelkajuitmodelle en hul pryse:
| Nissan Navara 2.5DDTi SE dubbelkajuit | 120 kW/ 403 Nm | 7,2 ℓ/ 100 km | 3,5 ton | R474 000 |
| Ford Ranger 2.2TDCi Hi-Rider XL Sport dubbelkajuit | 118 kW/ 385 Nm | 6,5 ℓ/ 100 km | 3,5 ton | R492 100 |
| Toyota Hilux 2.4GD-6 Raider dubbelkajuit | 110 kW/ 400 Nm | 7,1 ℓ/ 100 km | 2 ton | R515 300 |
| Isuzu D-Max 2.5 X-Rider dubbelkajuit | 100 kW/ 320 Nm | 7,7 ℓ/ 100 km | 2,75 ton | R518 300 |
Die Nissan Navara. (Foto: Cornel van Heerden)
Tot jy hom wil inruil en niks kry nie.
Praat jy, het 2010 gekoop vir R435k alles ingesluit, 11 maande later verkoop en R221k gekry met 18k km op en vol diens rekord.
Brendon is lief daarvoor om die grense in sy artikels te toets as dit by taalgebruik kom. ‘n Enjin rev nie, die toere word opgejaag. Daar is gereeld iemand wat kla en nou kla ek ook. Joernaliste is veronderstel om die hekwagters van goeie taalgebruik te wees.
Rev hom boetie rev hom.
Nog nooit n tydren jaer gehoor toere jaag nie.
As jy toer is jy rustig.
Ons almal se karre rev lekker, van Danville tot Durbanville.