Bushiri ontken verkragtingsklag; sê ‘wit polisiebeamptes’ pers hom af

Die selfverklaarde profeet Shepherd Bushiri. (Foto: Facebook)

Die charismatiese Malawiese prediker Shepherd Bushiri wat in Suid-Afrika teregstaan op verskeie aanklagte, sê die bykomende lasbriewe vir aanklagte van verkragting is deel van ʼn komplot teen hom.

“Ek is nie geskok of verbaas deur mediaberigte oor lasbriewe vir inhegtenisneming nie, omdat dit net deel van die groter kruistog is om my naam in die media te beswadder deur ʼn span van wit polisiebeamptes, vernaam van die Valke,” het Bushiri, leier van die gewilde Enlightenend Christian Gathering Church, gesê.

“Wanneer ʼn lasbrief vir inhegtenisneming uitgereik word,” het hy gesê, “doen wetstoepassingsowerhede daardie inhegtenisneming; hulle lek nie die inligting aan die media uit soos dit nog altyd in my geval met hierdie wit polisiebeamptes is nie.”

Die bykomende lasbriewe is vir verskillende verkragtingsaanklagte wat in onderskeidelik 2018 en vanjaar by die polisie aanhangig gemaak is.

In Augustus het sommige van diegene wat Bushiri beskuldig in ʼn onderhoud met eNCA aangevoer hulle was destyds lede van die kerk en is in ʼn Pretoriase hotel verkrag. Die identiteit van die vroue is beskerm.

Bushiri hou vol die vroue het hom probeer afpers vir geld en voer aan die polisie was betrokke by hierdie afpersing.

“Dit is wit polisiebeamptes teen wie ek in 2018 afpersing- en korrupsieaanklagte aanhangig gemaak het nadat hulle onsuksesvol probeer het om my vir R10 miljoen af te pers. In daardie stadium was hulle duidelik dat ‘versuim om die R10 miljoen te betaal tot onmiddellike weerwraak sou lei’,” het die selfverklaarde profeet gesê.

“Ten spyte daarvan dat hulle die open van sulke sake bevestig het, het die Suid-Afrikaanse owerhede geen tersaaklike stappe gedoen om hierdie wit polisiebeamptes aanspreeklik te hou nie. Pleks daarvan is hulle losgelaat en het hulle op die rug van staatshulpbronne begin met ʼn kruistog om hul misdade te verbloem deur verskeie lasbriewe vir my inhegtenisneming uit te reik.”

Bushiri het gesê dieselfde wit polisiebeamptes het hom in Februarie verlede jaar in hegtenis geneem.

Volgens Bushiri is hy ingelig dat die verkragtingsklagte deur die polisie se eenheid vir gesinsgeweld, kinderbeskerming en seksuele misdrywe – en nie die Valke nie – hanteer word.

“Ek het klagtes aanhangig gemaak oor hoe die Valke meisies werf om klagte van verkragting teen my te fabriseer en het tot dusver geen hulp gehad nie.”

Hy voer aan sommige van diegene betrokke by die aanklagte het later gebieg oor hulle “verkeerde gedrag”.

Bushiri hou vol solank die Valke sy saak ondersoek, gaan hy nie ʼn regverdige verhoor in Suid-Afrika kry nie “omdat daardie wit polisiebeamptes sonder twyfel en duidelik deur wraak en nie geregtigheid nie, gedryf word”.

Bushiri ontken die aanklagte van verkragting.

“Bowenal, as ʼn gerespekteerde man van God, ʼn man en pa verstaan ek dat verkragting ʼn gruwelike misdaad is wat indruis teen alles waarvoor ek staan en waarin ek glo. So ywerig as wat ek is om my naam in ere te herstel, weier ek onteenseglik om die mediaspektakel wat deur wit polisiebeamptes geskep is om hul misdade te verbloem, te voer. My gewete is skoon en sal ook só bly,” het hy gesê.

Bushiri en sy vrou, Mary, het uit Suid-Afrika gevlug nadat hulle op borgtog van R200 000 elk vrygelaat is. Hulle word betrek by bedrog, diefstal en geldwassery van miljoene rande. Lasbriewe ná dié ontsnapping is reeds uitgereik.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

61 Kommentare

jongste oudste gewildste
Derick

Ek wonder of daar enige wit mense in sy kerk is? Vra maar net.

Plaaskind

Gaan …… op die ys man.

Maggies

Nog ‘n rassis. Wat het hy in elk geval in Suid Afrika kom soek. Natuurlik wetteloosheid.

Alta Alleman

Ja nee….die witman word alweer vir alles blameer.

Daniel

Daarsy!
Die geheime wapen: die rassekaart!
Glibberige karakter