Argieffoto (Foto: Motshwari Mofokeng/African News Agency/ANA)
Die DA het Donderdag regsdokumente by die verkiesingshof ingedien om alle ambassades, hoë kommissarisse en konsulate as stemlokale vir die 2024-verkiesing te versoek.
Dit volg op briewe wat verlede week aan die Onafhanklike Verkiesingskommissie (OVK) en die departement van internasionale betrekkinge en samewerking (Dirco) gestuur is waarin dieselfde versoek is.
Helen Zille, voorsitter van die DA se federale raad, sê die OVK het op die DA se kommunikasie gereageer en aangedui dat Dirco verantwoordelik is vir die aanwys van stemlokale in die buiteland.
“Die DA het egter nog geen terugvoer van Dirco ontvang nie en het daarom besluit om die howe vir bystand te nader.”
Sy sê hierdie optrede volg in reaksie op klagtes van Suid-Afrikaners wat in Perth woon, wat die erekonsulaat as ʼn stemfasiliteit aangevra het.
“Die hoë kommissaris in Canberra het op hierdie besware en versoeke gereageer en gesê dat die Perth-konsulaat nie vir stemming gebruik kan word nie, aangesien dit ‘nie deur oorgeplaaste personeel van Suid-Afrika gelei word nie’.
“Dit is teenstrydig met die huidige Kieswet, wat Suid-Afrikaners in die buiteland toelaat om hul stemme by enige ambassade, hoë kommissaris of konsulaat uit te bring.”
Zille sê die DA beskou die standpunt van die hoë kommissaris in Canberra “as onwettig én irrasioneel”.
Die party voer aan dat die OVK en Dirco nie moet onderskei tussen konsulate onder leiding van “oorgeplaaste personeel” en “dié wat deur erekonsulate gelei word” nie.
“Met ʼn bevolking van 200 000 Suid-Afrikaners in Australië en meer as 1 miljoen wat glo wêreldwyd woon, werk, studeer of reis, moet die OVK en Dirco voldoende geleenthede vir hierdie burgers verseker om hul grondwetlike stemreg uit te oefen,” sê Zille.
