‘n Fratsgolf by Durban se promenade het drie mense gedood. (Foto: Facebook/ KZN VIP Services)
Drie mense is dood en talle beseer nadat ʼn fratsgolf ʼn Durbanse strand getref het.
Paramedici het Saterdagmiddag op ʼn noodoproep by die Durbanse promenade reageer. Volgens inligting op die toneel was die strand propvol vakansiegangers en van die strandgangers is die see in meegesleur.
“Die golf het die slagoffers teen die pier vasgeslaan, wat ernstige beserings veroorsaak het,” het die nooddienste KZN VIP Services, gesê. Drie mense, vermoedelik tieners, is gevolglik dood.
Volgens Robert McKenzie, woordvoerder van die nooddienste in KwaZulu-Natal, het paramedici 17 mense op die toneel behandel. Almal was in ʼn ernstige tot kritieke toestand en is na ʼn nabygeleë hospitaal vervoer.
Die strand was vir die res van die dag gesluit.
