Die Nasionale Senior Sertifikaat-eksamen se tweede lewenswetenskappevraestel was oor die algemeen goed, gebalanseerd en het voldoen aan die vereistes van die KABV, Blooms-taksonomie, moeilikheidsgraag en onderwerpgewigswaardes.
“Leerders moes egter mooi lees om te antwoord wat gevra word, en nie onnodige foute maak met die skryf van byvoorbeeld genetiese kruising nie,” sê ’n onderwyser by monde van die Federasie van Beheerliggame van Suid-Afrikaanse Skole (Fedsas).
“Leerders wat goed voorberei het, behoort goed te vaar.”
Volgens nog ʼn wetenskaponderwyser meen die leerders die vraestel was “regverdig en billik”. “Daar was niks buitengewoon nie, maar daar is beslis ʼn neiging dat hulle die vrae anders begin stel. Hulle toets die leerders se kennis om te kyk of hulle dit wat hulle geleer het, kan toepas. Dit is beslis nie net meer voor-die-hand-liggend nie.”