Man met dood gedreig ná Spur-voorval

Jacques Paynn (Foto: Verskaf)

Jacques Paynn (Foto: Verskaf)

ʼn Gesin van Capital Park in Pretoria vrees vir hul lewe nadat hulle talle doodsdreigemente gekry het sedert hul telefoonnommer en huisadres verkeerdelik as dié van die man in die sogenaamde Spur-voorval versprei is.

Jacque Paynn het hom Donderdag tot die burgerregte-organisasie AfriForum se trauma-eenheid gewend nadat hy en sy gesin in minder as 24 uur nagenoeg 500 oproepe en SMS’e gekry het wat dreig om die gesinslede se lewe te neem.

Paynn, wat in ʼn tuinwoonstel saam met sy vrou, 16-jarige dogter en ma woon, het Donderdag aan Maroela Media vertel die gesin is totaal geskok en oorbluf ná die voorval, en vrees dat rowers regtig sal toeslaan.

Hy sê die gesin het doodsdreigemente begin kry kort nadat hy Dinsdagaand op ʼn mediaberig op Facebook ‘die wit man verdedig het’.

“Toe ek Woensdagoggend wakker word en op Facebook gaan, het ek baie kennisgewings gehad. Ek het by nadere ondersoek gesien dat dit alles deur mense is wat op my kommentaar gereageer het. Die mense was woedend – hulle het my kop geëis,” sê hy.

ʼn Ander Facebook-gebruiker, Arthur Mcdonald Sibanyoni, het intussen ook Paynn se selfoonnommer en woonadres op sosiale media versprei. Sibanyoni het Paynn egter verkeerdelik geïdentifiseer as Nico Viljoen, die man wat glo in die Spur-voorval betrokke was.

Paynn sê sy selfoonnommer was wel op Facebook, maar dat hy onseker is waar die persoon sy huisadres in die hande gekry het.

“Dis tóé dat die oproepe begin instroom. Mense bel en SMS, dan sê hulle ons moet op die uitkyk wees, want hulle kom vir ons; hulle gaan ons vermoor. Hulle SMS en sê hulle gaan my vrou verkrag en haar dan doodmaak.

'n Skermskoot van die kontakbesonderhede wat versprei word (Foto: Twitter)

‘n Skermskoot van die kontakbesonderhede wat versprei word (Foto: Twitter)

“Ons weet nie wat om te doen nie. Ons kon Woensdag nie ʼn oog toemaak nie. Ons was kort-kort om die huis om seker te maak dat alles oukei is. My dogter moet skool toe gaan en sy is erg getraumatiseerd. Ons weet nie wanneer slaan hulle toe nie – en dit alles omdat die verkeerde kontakbesonderhede versprei word,” sê hy.

Paynn het intussen sy selnommer gedeaktiveer en verwyder nou ook sy profiele van sosiale media.

Nantes Kelder, hoof van AfriForum se trauma-eenheid, het Donderdag gesê die burgerregte-organisasie veroordeel dié dreigemente ten sterkste.

“Die belangrikste ding om in dié stadium te doen is om die veldbrand te probeer keer sodat niemand seerkry nie. Ons moet by die wortel van die voorval uitkom en vasstel wie die kontakbesonderhede versprei het. Maar die hoofprioriteit is om te verseker dat hierdie man en sy gesin veilig is,” sê hy.

Pierre van Tonder, uitvoerende hoof van die restaurantgroep, het Donderdag gesê Spur is nie bewus van die dreigemente en die verkeerdelike verspreiding van Paynn se kontakbesonderhede nie.

Hy sê egter die organisasie sal alles in sy vermoë doen om te keer dat die inligting verder versprei word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

84 Kommentare

jongste oudste gewildste
Susanna

Ek persoonlik dink groot mense moet nou optree soos volwassenses of jy nou swart rooi pink blou wit groen geel oranje is WORD GROOT GROW UP julle is die rede hoekom ons land agteruit boer en nie vorentoe kan beweeg en in vrede saam met mekaar kan lewe nie. Spur is beslis nie die ENIGSTE restaurant in die land nie???? En die wat so vinnig op sosiale media spring vir kommentaar word groot en lees eers dan kan jy dalk seker wees oor jou feite

Siestog

Hierdie hele storie is belaglik. Word groot mense. Hou jou dreigemente vir jouself. Voor jy wil dreig, maak seker jy het die regte persoon en selfs dan gee dit jou nie die reg om te dreig nie. Hoef nie vêr te soek wie die regte rassiste is nie.

Chanel

Verskoon my onkunde maroela media ma die adres en sel nommer wat in die berig uitgehaal en gedof word word in die fotos onderaan wel gewys. Moet dit nie ook uit nie?

kat

Ja asb!

Chantell

Nou gaan spur glen vir hom ook trauma counciling gee ens aangesien dit vir die dametjie gedoen kan word die arm ou het niks met dit uit te waai nie…..vat hulle almal hof toe wat boodskappe stuur en op FB jou details uitgee en share en blameer dit op race maar soos gewoonlik sal niks gedoen word omtrent dit nie laat jou stem gehoor word.