Die 57-jarige Dirk Wismeijer is Vrydag in hegtenis geneem op aanklag van dwelmhandel. (Foto: SA Polisie/Valke)
ʼn Man wat glo ʼn pakkie met 12 g metamfetamien, ook bekend as die dwelm “tik”, met Postnet vanaf Gqeberha na Frankryk wou stuur, bly agter tralies.
Die 57-jarige Dirk Wismeijer is Vrydag in hegtenis geneem op aanklag van dwelmhandel nadat hy by ʼn gastehuis in Kirkwood aangekeer is, sê kapt. Yolisa Mgolodela, woordvoerder van die Valke.
Lede van die Valke se narkotikaburo en hul kollegas by die eenheid vir ernstige georganiseerde misdaad het die ondersoek behartig nadat Wismeijer die pakkie glo die vorige dag by ʼn Postnet-tak by The Acres laat versend het.
Die dwelms is sowat R4 000 werd.
Wismeijer het reeds in die landdroshof op Gqeberha verskyn en is op borgtog van R5 000 vrygelaat. Hy verskyn weer volgende maand in die hof.
