Altesaam 25 sake-ondernemings moet geskuif word nadat ʼn brand Woensdag die 25ste verdieping van ʼn Durbanse wolkekrabber verwoes het.
Urban Lime Properties, ʼn stedelike herlewingsmaatskappy en eienaar van die gebou, Redefine Towers, wat algemeen bekend staan as 320 West Street, het Saterdag in ʼn verklaring gesê die brand het 5 000 vierkante meter se eiendom beskadig.
Katie Freidman, die maatskappy se hoof van mediabetrekkinge, het gesê die gebou is van die 23ste tot die 26ste verdieping beskadig.
Die 25ste verdieping het brandskade opgedoen, terwyl die twee verdiepings daaronder waterskade en die 26ste verdieping rookskade opgedoen het.
“Die vloere het sowat 25 verskillende sake-ondernemings gehuisves, insluitende die kantore van Urban Lime Properties, wat heeltemal verwoes is. Al die ondernemings sal na ander vloere in die gebou geskuif word,” het sy gesê.
Johnny Friedman, uitvoerende hoof van die maatskappy, het gesê spanne werk al om die uur om so gou as moontlik alternatiewe ruimte te vind vir die ondernemings wat geraak is.
“Die oorsaak van die brand is nog nie bekend nie, maar forensiese kenners fynkam steeds bewyse voordat hulle ʼn volledige verslag uitreik,” het hy gesê.